मुक्तामयपञ्चदशप्राकारस्थितदण्डिनीवाराहीध्यानम्

॥ अथ मुक्तामयपञ्चदशप्राकारस्थितदण्डिनीवाराहीध्यानम् ॥ अथ मुक्ताख्यसालस्यान्तरे मारुतयोजने । सालोन्मरकताभिख्यश्चतुर्योजनमुच्छ्रतः ॥ १ ॥ पूर्ववद्गोपुरादीनां संस्थानैश्च सुशोभितः । सर्वाः स्थालीर्मरकतश्रेणिभिः खचिताः शुभाः ॥ २ ॥ हेमतालवनाढ्या च सर्ववस्तुसमाकुला । तत्र श्रीदण्डनाथाया दहनादिविदिग्गताः ॥ ३ ॥ चत्त्वारो निलयाः प्रोक्ताः मन्त्रिणीगृहविस्तृताः । किरिचक्ररथेन्द्रस्य याः पर्वाणि समाश्रिताः ॥ ४ ॥ भण्डासुरमहायुद्धे ता देव्यस्तत्र जाग्रति । जम्भिन्याद्याः चक्रदेव्यो हेतुकांश्चैव भैरवाः ॥ ५ ॥ सप्त निग्रहदेव्याश्च नृत्यन्ति मदविह्वलाः । चतुर्विदिक्षु दण्डिन्या यत्र यत्र महद्गृहम् ॥ ६ ॥ तत्रपूर्वादिदिग्भागे देवीसदृशवर्चसः । उन्मत्तभैरवी चैव स्वप्नेशी च तिरस्कृतिः ॥ ७ ॥ तथा किरीटिनी देवी सेवन्ते दण्डनायिकाम् । एषकक्ष्या मरकतप्रकृतिः सर्वतो दिशः ॥ ८ ॥ निवासो दण्डनाथायाः केवलं त्वाभिमानिकः । दण्डनाथा तत्र देवि शतस्तम्भाढ्यमण्डपे ॥ ९ ॥ कार्तस्वरमयाम्भोजकर्णिकामध्यसंस्थितम् । बिन्दुत्रिकोणवृत्ताढ्यं षड्दलवृत्तयुग्मकम् ॥ १० ॥ चक्रं विराजिते तत्र तप्तकाञ्चनसन्निभा । सन्ध्यारुणलसच्चेला सर्वाभरणमण्डिता ॥ ११ ॥ शङ्खचक्राभयवरान् हलं च मुसलं तथा । पाशाङ्कुशौ च दधती चन्द्ररेखावतंसिनी । वाराहवक्त्रसंयुक्ता दण्डिनी तत्र वर्तते ॥ १२ ॥ अस्य मुक्तामयदुर्गस्य पुरःस्थामरकतमयदुर्गस्य च अन्तरालभूतपञ्चदश्याः कक्ष्यायाः सुवर्णमयतालवणे किरिचक्रासने रथस्थदेवताभिः किरिचक्रासने दण्डिनीर्भूता वाराहीदेवी परिवारेण च समं निजायुधानि धृत्वा रक्षिका भूत्वास्ते ॥ १३ ॥ ॥ इति मुक्तामयपञ्चदशप्राकारस्थितदण्डिनीवाराहीध्यानं सम्पूर्णम् ॥