Sri Chinnamasta Ashtottara Shatanama Stotram – श्री छिन्नमस्ता अष्टोत्तरशतनाम स्तोत्रम्

॥ श्री छिन्नमस्ता अष्टोत्तरशतनाम स्तोत्रम् ॥ श्री पार्वत्युवाच – नाम्नां सहस्रं परमं छिन्नमस्ताप्रियं शुभम् । कथितं भवता शम्भोस्सद्यश्शत्रुनिकृन्तनम् ॥ १ ॥ पुनः पृच्छाम्यहं देव कृपां कुरु ममोपरि । सहस्रनामपाठे च अशक्तो यः पुमान् भवेत् ॥ २ ॥ तेन किं पठ्यते नाथ तन्मे ब्रूहि कृपामय । श्री सदाशिव उवाच – अष्टोत्तरशतं नाम्नां पठ्यते तेन सर्वदा ॥ ३ ॥ सहस्रनामपाठस्य फलं प्राप्नोति निश्चितम् । ॥ विनियोग ॥ ओं अस्य श्रीछिन्नमस्तादेव्यष्टोत्तर शतनाम स्तोत्रमहामन्त्रस्य सदाशिव ऋषिः अनुष्टुप् छन्दः श्रीछिन्नमस्ता देवता मम सकलसिद्धि प्राप्तये जपे विनियोगः ॥ ॥ स्तोत्र प्रारम्भ ॥ ओं छिन्नमस्ता महाविद्या महाभीमा महोदरी । चण्डेश्वरी चण्डमाता चण्डमुण्डप्रभञ्जिनी ॥ ४ ॥ महाचण्डा चण्डरूपा चण्डिका चण्डखण्डिनी । क्रोधिनी क्रोधजननी क्रोधरूपा कुहूः कला ॥ ५ ॥ कोपातुरा कोपयुता कोपसंहारकारिणी । वज्रवैरोचनी वज्रा वज्रकल्पा च डाकिनी ॥ ६ ॥ डाकिनीकर्मनिरता डाकिनीकर्मपूजिता । डाकिनीसङ्गनिरता डाकिनीप्रेमपूरिता ॥ ७ ॥ खट्वाङ्गधारिणी खर्वा खड्गखर्परधारिणी । प्रेतासना प्रेतयुता प्रेतसङ्गविहारिणी ॥ ८ ॥ छिन्नमुण्डधरा छिन्नचण्डविद्या च चित्रिणी । घोररूपा घोरदृष्टिः घोररावा घनोदरी ॥ ९ ॥ योगिनी योगनिरता जपयज्ञपरायणा । योनिचक्रमयी योनिर्योनिचक्रप्रवर्तिनी ॥ १० ॥ योनिमुद्रा योनिगम्या योनियन्त्रनिवासिनी । यन्त्ररूपा यन्त्रमयी यन्त्रेशी यन्त्रपूजिता ॥ ११ ॥ कीर्त्या कपर्दिनी काली कङ्काली कलकारिणी । आरक्ता रक्तनयना रक्तपानपरायणा ॥ १२ ॥ भवानी भूतिदा भूतिर्भूतिधात्री च भैरवी । भैरवाचारनिरता भूतभैरवसेविता ॥ १३ ॥ भीमा भीमेश्वरी देवी भीमनादपरायणा । भवाराध्या भवनुता भवसागरतारिणी ॥ १४ ॥ भद्रकाली भद्रतनुर्भद्ररूपा च भद्रिका । भद्ररूपा महाभद्रा सुभद्रा भद्रपालिनी ॥ १५ ॥ सुभव्या भव्यवदना सुमुखी सिद्धसेविता । सिद्धिदा सिद्धिनिवहा सिद्धा सिद्धनिषेविता ॥ १६ ॥ शुभदा शुभगा शुद्धा शुद्धसत्त्वा शुभावहा । श्रेष्ठा दृष्टिमयी देवी दृष्टिसंहारकारिणी ॥ १७ ॥ शर्वाणी सर्वगा सर्वा सर्वमङ्गलकारिणी । शिवा शान्ता शान्तिरूपा मृडानी मदानतुरा ॥ १८ ॥ ॥ फलश्रुति ॥ इति ते कथितं देवी स्तोत्रं परमदुर्लभम् । गुह्याद्गुह्यतरं गोप्यं गोपनियं प्रयत्नतः ॥ १९ ॥ किमत्र बहुनोक्तेन त्वदग्रे प्राणवल्लभे । मारणं मोहनं देवि ह्युच्चाटनमतः परम् ॥ २० ॥ स्तम्भनादिककर्माणि ऋद्धयस्सिद्धयोऽपि च । त्रिकालपठनादस्य सर्वे सिद्ध्यन्त्यसंशयः ॥ २१ ॥ महोत्तमं स्तोत्रमिदं वरानने मयेरितं नित्यमनन्यबुद्धयः । पठन्ति ये भक्तियुता नरोत्तमा भवेन्न तेषां रिपुभिः पराजयः ॥ २२ ॥ ॥ इति श्रीछिन्नमस्तादेव्यष्टोत्तरशतनाम स्तोत्रम् सम्पूर्णम् ॥ इतर पश्यतु ।