Sri Surya Kavacham (Trailokya Mangalam) – श्री सूर्य कवचम् (त्रैलोक्यमङ्गलम्)

॥ श्री सूर्य कवचम् (त्रैलोक्यमङ्गलम्) ॥ ॥ श्रीब्रह्मयामले तन्त्र ॥ ॥ श्रीसूर्य उवाच ॥ साम्ब साम्ब महाबाहो शृणु मे कवचं शुभम् । त्रैलोक्यमङ्गलं नाम कवचं परमाद्भुतम् ॥ १ ॥ यज्ज्ञात्वा मन्त्रवित् सम्यक् फलं प्राप्नोति निश्चितम् । यद्धृत्वा च महादेवो गणानामधिपोऽभवत् ॥ २ ॥ पठनाद्धारणाद्विष्णुः सर्वेषां पालकः सदा । एवमिन्द्रादयः सर्वे सर्वैश्वर्यमवाप्नुयुः ॥ ३ ॥ ॥ विनियोग ॥ कवचस्य ऋषिर्ब्रह्मा छन्दोऽनुष्टुबुदाहृतः । श्रीसूर्यो देवता चात्र सर्वदेवनमस्कृतः ॥ यश आरोग्यमोक्षेषु विनियोगः प्रकीर्तितः ॥ ४ ॥ ॥ न्यास (शरीर रक्षा) ॥ प्रणवो मे शिरः पातु घृणिर्मे पातु भालकम् । सूर्योऽव्यान्नयनद्वन्द्वमादित्यः कर्णयुग्मकम् ॥ ५ ॥ अष्टाक्षरो महामन्त्रः सर्वाभीष्टफलप्रदः । ह्रीं बीजं मे मुखं पातु हृदयं भुवनेश्वरी ॥ ६ ॥ चन्द्रबिम्बं विंशदाद्यं पातु मे गुह्यदेशकम् । अक्षरोऽसौ महामन्त्रः सर्वतन्त्रेषु गोपितः ॥ ७ ॥ शिवो वह्निसमायुक्तो वामाक्षीबिन्दुभूषितः । एकाक्षरो महामन्त्रः श्रीसूर्यस्य प्रकीर्तितः ॥ ८ ॥ गुह्याद्गुह्यतरो मन्त्रो वाञ्छाचिन्तामणिः स्मृतः । शीर्षादिपादपर्यन्तं सदा पातु मनूत्तमः ॥ ९ ॥ ॥ फलश्रुति ॥ इति ते कथितं दिव्यं त्रिषु लोकेषु दुर्लभम् । श्रीप्रदं कान्तिदं नित्यं धनारोग्यविवर्धनम् ॥ १० ॥ कुष्ठादिरोगशमनं महाव्याधिविनाशनम् । त्रिसन्ध्यं यः पठेन्नित्यमरोगी बलवान्भवेत् ॥ ११ ॥ बहुना किमिहोक्तेन यद्यन्मनसि वर्तते । तत्तत्सर्वं भवेत्तस्य कवचस्य च धारणात् ॥ १२ ॥ भूतप्रेतपिशाचाश्च यक्षगन्धर्वराक्षसाः । ब्रह्मराक्षसवेताला न द्रष्टुमपि तं क्षमाः ॥ १३ ॥ दूरादेव पलायन्ते तस्य सङ्कीर्तनादपि । भूर्जपत्रे समालिख्य रोचनागुरुकुङ्कुमैः ॥ १४ ॥ रविवारे च सङ्क्रान्त्यां सप्तम्यां च विशेषतः । धारयेत् साधकश्रेष्ठः स परो मे प्रियो भवेत् ॥ १५ ॥ त्रिलोहमध्यगं कृत्वा धारयेद्दक्षिणे करे । शिखायामथवा कण्ठे सोऽपि सूर्यो न संशयः ॥ १६ ॥ इति ते कथितं साम्ब त्रैलोक्यमङ्गलाभिधम् । कवचं दुर्लभं लोके तव स्नेहात् प्रकाशितम् ॥ १७ ॥ अज्ञात्वा कवचं दिव्यं यो जपेत् सूर्यमुत्तमम् । सिद्धिर्न जायते तस्य कल्पकोटिशतैरपि ॥ १८ ॥ ॥ इति श्रीब्रह्मयामले त्रैलोक्यमङ्गलं नाम श्री सूर्य कवचम् सम्पूर्णम् ॥