श्री आदित्य कवचम् – Sri Aditya Kavacham | सूर्य देव रक्षा स्तोत्र

॥ श्री आदित्य कवचम् ॥ ॥ विनियोगः ॥ अस्य श्री आदित्यकवचस्तोत्रमहामन्त्रस्य अगस्त्यो भगवानृषिः अनुष्टुप्छन्दः । आदित्यो देवता । श्रीं बीजं । णीं शक्तिः । सूं कीलकं । मम आदित्यप्रसादसिद्ध्यर्थे जपे विनियोगः ॥ ॥ ध्यानम् ॥ जपाकुसुमसङ्काशं द्विभुजं पद्महस्तकम् । सिन्दूराम्बरमाल्यं च रक्तगन्धानुलेपनम् ॥ १ ॥ माणिक्यरत्नखचितसर्वाभरणभूषितम् । सप्ताश्वरथवाहं तु मेरुं चैव प्रदक्षिणम् ॥ २ ॥ देवासुरवरैर्वन्द्यं घृणिभिः परिसेवितम् । ध्यायेत् पठेत् सुवर्णाभं सूर्यस्य कवचं मुदा ॥ ३ ॥ ॥ अथ कवचम् ॥ घृणिः पातु शिरोदेशे सूर्यः पातु ललाटकम् । आदित्यो लोचने पातु श्रुती पातु दिवाकरः ॥ ४ ॥ घ्राणं पातु सदा भानुः मुखं पातु सदा रविः । जिह्वां पातु जगन्नेत्रः कण्ठं पातु विभावसुः ॥ ५ ॥ स्कन्धौ ग्रहपतिः पातु भुजौ पातु प्रभाकरः । करावब्जकरः पातु हृदयं पातु नभोमणिः ॥ ६ ॥ द्वादशात्मा कटिं पातु सविता पातु सक्थिनी । ऊरू पातु सुरश्रेष्ठो जानुनी पातु भास्करः ॥ ७ ॥ जङ्घे मे पातु मार्ताण्डो गुल्फौ पातु त्विषां पतिः । पादौ दिनमणिः पातु पातु मित्रोऽखिलं वपुः ॥ ८ ॥ ॥ फलश्रुति ॥ आदित्यकवचं पुण्यमभेद्यं वज्रसन्निभम् । सर्वरोगभयादिभ्यो मुच्यते नात्र संशयः ॥ ९ ॥ संवत्सरमुपासित्वा साम्राज्यपदवीं लभेत् । अशेषरोगशान्त्यर्थं ध्यायेदादित्यमण्डलम् ॥ १० ॥ ॥ आदित्य मण्डल स्तुतिः ॥ अनेकरत्नसम्युक्तं स्वर्णमाणिक्यभूषणम् । कल्पवृक्षसमाकीर्णं कदम्बकुसुमप्रियम् ॥ ११ ॥ सिन्दूरवर्णाय सुमण्डलाय सुवर्णरत्नाभरणाय तुभ्यम् । पद्मादिनेत्रे च सुपङ्कजाय ब्रह्मेन्द्र-नारायण-शङ्कराय ॥ १२ ॥ संरक्तचूर्णं ससुवर्णतोयं सकुङ्कुमाभं सकुशं सपुष्पम् । प्रदत्तमादाय च हेमपात्रे प्रशस्तनादं भगवन् प्रसीद ॥ १३ ॥ ॥ इति श्री आदित्य कवचम् सम्पूर्णम् ॥