Sri Gayatri Ramayana Stotram – श्री गायत्री रामायणम् (गायत्री मन्त्र सम्पुटितम्)

तपस्स्वाध्यायनिरतं तपस्वी वाग्विदां वरम् । नारदं परिपप्रच्छ वाल्मीकिर्मुनिपुङ्गवम् ॥ १ ॥ (मन्त्र वर्ण: 'त' - तत्) स हत्वा राक्षसान्सर्वान् यज्ञघ्नान् रघुनन्दनः । ऋषिभिः पूजितस्तत्र यथेन्द्रो विजयी पुरा ॥ २ ॥ (मन्त्र वर्ण: 'स' - सवितुः) विश्वामित्रः सरामस्तु श्रुत्वा जनकभाषितम् । वत्स राम धनुः पश्य इति राघवमब्रवीत् ॥ ३ ॥ (मन्त्र वर्ण: 'वि' - वरेण्यं) तुष्टावास्य तदा वंशं प्रविश्य च विशाम्पतेः । शयनीयं नरेन्द्रस्य तदासाद्य व्यतिष्ठत ॥ ४ ॥ (मन्त्र वर्ण: 'तु' - सवितुः) वनवासं हि सङ्ख्याय वासांस्याभरणानि च । भर्तारमनुगच्छन्त्यै सीतायै श्वशुरो ददौ ॥ ५ ॥ (मन्त्र वर्ण: 'व' - वरेण्यं) राजा सत्यं च धर्मश्च राजा कुलवतां कुलम् । राजा माता पिता चैव राजा हितकरो नृणाम् ॥ ६ ॥ (मन्त्र वर्ण: 'रे' - वरेण्यं) निरीक्ष्य स मुहूर्तं तु ददर्श भरतो गुरुम् । उटजे राममासीनं जटामण्डलधारिणम् ॥ ७ ॥ (मन्त्र वर्ण: 'णि' - वरेण्यं) यदि बुद्धिः कृता द्रष्टुमगस्त्यं तं महामुनिम् । अद्यैव गमने बुद्धिं रोचयस्व महामते ॥ ८ ॥ (मन्त्र वर्ण: 'यं' - वरेण्यं) भरतस्यार्यपुत्रस्य श्वश्रूणां मम च प्रभो । मृगरूपमिदं व्यक्तं विस्मयं जनयिष्यति ॥ ९ ॥ (मन्त्र वर्ण: 'भ' - भर्गो) गच्छ शीघ्रमितो राम सुग्रीवं तं महाबलम् । वयस्यं तं कुरु क्षिप्रमितो गत्वाऽद्य राघव ॥ १० ॥ (मन्त्र वर्ण: 'र्गो' - भर्गो) देशकालौ भजस्वाद्य क्षममाणः प्रियाप्रिये । सुखदुःखसहः काले सुग्रीववशगो भव ॥ ११ ॥ (मन्त्र वर्ण: 'दे' - देवस्य) वन्दितव्यास्ततः सिद्धास्तपसा वीतकल्मषाः । प्रष्टव्या चापि सीतायाः प्रवृत्तिर्विनयान्वितैः ॥ १२ ॥ (मन्त्र वर्ण: 'व' - देवस्य) स निर्जित्य पुरीं लङ्कां श्रेष्ठां तां कामरूपिणीम् । विक्रमेण महातेजा हनूमान् कपिसत्तमः ॥ १३ ॥ (मन्त्र वर्ण: 'स्य' - देवस्य) धन्या देवाः सगन्धर्वाः सिद्धाश्च परमर्षयः । मम पश्यन्ति ये वीरं रामं राजीवलोचनम् ॥ १४ ॥ (मन्त्र वर्ण: 'धी' - धीमहि) मङ्गलाभिमुखी तस्य सा तदासीन्महाकपेः । उपतस्थे विशालाक्षी प्रयता हव्यवाहनम् ॥ १५ ॥ (मन्त्र वर्ण: 'म' - धीमहि) हितं महार्थं मृदु हेतुसंहितं व्यतीतकालायतिसम्प्रतिक्षमम् । निशम्य तद्वाक्यमुपस्थितज्वरः प्रसङ्गवानुत्तरमेतदब्रवीत् ॥ १६ ॥ (मन्त्र वर्ण: 'हि' - धीमहि) धर्मात्मा रक्षसश्रेष्ठः सम्प्राप्तोऽयं विभीषणः । लङ्कैश्वर्यमिदं श्रीमान्श्रुवं प्राप्नोत्यकण्टकम् ॥ १७ ॥ (मन्त्र वर्ण: 'धि' - धियो) यो वज्रपाताशनिसन्निपातान्न चुक्षुभे नापि चचाल राजा । स रामबाणाभिहतो भृशार्तश्चचाल चापं च मुमोच वीरः ॥ १८ ॥ (मन्त्र वर्ण: 'यो' - धियो) यस्य विक्रममासाद्य राक्षसा निधनं गताः । तं मन्ये राघवं वीरं नारायणमनामयम् ॥ १९ ॥ (मन्त्र वर्ण: 'यो' - यो नः) न ते ददृशिरे रामं दहन्तमपिवाहिनीम् । मोहितः परमास्त्रेण गान्धर्वेण महात्मना ॥ २० ॥ (मन्त्र वर्ण: 'नः' - यो नः) प्रणम्य देवताभ्यश्च ब्राह्मणेभ्यश्च मैथिली । बद्धाञ्जलिपुटा चेदमुवाचाग्निसमीपतः ॥ २१ ॥ (मन्त्र वर्ण: 'प्र' - प्रचोदयात्) चलनात्पर्वतस्यैव गणा देवाश्च कम्पिताः । चचाल पार्वती चापि तदाश्लिष्टा महेश्वरम् ॥ २२ ॥ (मन्त्र वर्ण: 'चो' - प्रचोदयात्) दाराः पुत्राः पुरं राष्ट्रं भोगाच्छादनभोजनम् । सर्वमेवाविभक्तं नौ भविष्यति हरीश्वर ॥ २३ ॥ (मन्त्र वर्ण: 'द' - प्रचोदयात्) यामेव रात्रिं शत्रुघ्नः पर्णशालां समाविशत् । तामेव रात्रिं सीतापि प्रसूता दारकद्वयम् ॥ २४ ॥ (मन्त्र वर्ण: 'यात्' - प्रचोदयात्) ॥ फलश्रुति ॥इदं रामायणं कृत्स्नं गायत्रीबीजसंयुतम् । त्रिसन्ध्यं यः पठेन्नित्यं सर्वपापैः प्रमुच्यते ॥