Sri Gayatri Aksharavalli Stotram – श्री गायत्र्यक्षरवल्ली स्तोत्रम्

तत्कारं चम्पकं पीतं ब्रह्मविष्णुशिवात्मकम् । शान्तं पद्मासनारूढं ध्यायेत् स्वस्थान संस्थितम् ॥ १ ॥ सकारं चिन्तयेच्छान्तं अतसीपुष्पसन्निभम् । पद्ममध्यस्थितं काम्यमुपपातकनाशनम् ॥ २ ॥ विकारं कपिलं चिन्त्यं कमलासनसंस्थितम् । ध्यायेच्छान्तं द्विजश्रेष्ठो महापातकनाशनम् ॥ ३ ॥ तुकारं चिन्तयेत्प्राज्ञ इन्द्रनीलसमप्रभम् । निर्दहेत्सर्वदुःखस्तु ग्रहरोगसमुद्भवम् ॥ ४ ॥ वकारं वह्निदीप्ताभं चिन्तयित्वा विचक्षणः । भ्रूणहत्याकृतं पापं तक्षणादेव नाशयेत् ॥ ५ ॥ रेकारं विमलं ध्यायेच्छुद्धस्फटिकसन्निभम् । पापं नश्यति तत् क्षिप्रमगम्यागमनोद्भवम् ॥ ६ ॥ णिकारं चिन्तयेद्योगी विद्युद्वल्लीसमप्रभम् । अभक्ष्यभक्षजं पापं तत्क्षणादेव नश्यति ॥ ७ ॥ यङ्कारं तारकावर्णमिन्दुशेखरभूषितम् । योगिनां वरदं ध्यायेद्ब्रह्महत्याघनाशनम् ॥ ८ ॥ भकारं कृष्णवर्णं तु नीलमेघसमप्रभम् । ध्यात्वा पुरुषहत्यादि पापं नाशयति द्विजः ॥ ९ ॥ र्गोकारं रक्तवर्णं तु कमलासन संस्थितम् । तं गोहत्याकृतं पापं नाशयेच्च विचिन्तयन् ॥ १० ॥ देकारं मकरश्यामं कमलासनसंस्थितम् । चिन्तयेत्सततं योगी स्त्रीहत्यादहनं परम् ॥ ११ ॥ वकारं शुक्लवर्णं तु जाजीपुष्पसमप्रभम् । गुरुहत्या कृतं पापं ध्यात्वा दहति तत्क्षणात् ॥ १२ ॥ स्यकारं च तदा पीतं सुवर्ण सदृशप्रभम् । मनसा चिन्तितं पापं ध्यात्वा दहति निश्चयम् ॥ १३ ॥ धीकारं चिन्तयेच्छुभ्रं कुन्दपुष्पसमप्रभम् । पितृमातृवधात्पापान्मुच्यते नात्र संशयः ॥ १४ ॥ मकारं पद्मरागाभां चिन्तयेद्दीप्ततेजसम् । पूर्वजन्मार्जितं पापं तत्क्षणादेव नश्यति ॥ १५ ॥ हिकारं शङ्खवर्णं च पूर्णचन्द्रसमप्रभम् । अशेषपापदहनं ध्यायेन्नित्यं विचक्षणः ॥ १६ ॥ धिक्कारं पाण्डुरं ध्यायेत्पद्मस्योपरिसंस्थितम् । प्रतिग्रहकृतं पापं तत्क्षणादेव नश्यति ॥ १७ ॥ योकारं रक्तवर्णं तु इन्द्रगोपसमप्रभम् । ध्यात्वा प्राणिवधं पापं दहत्यग्निरिवेन्धनम् ॥ १८ ॥ द्वितीयच्चैव यः प्राक्तो योकारो रक्तसन्निभः । निर्दहेत्सर्वपापानि नान्यैः पापैश्च लिप्यते ॥ १९ ॥ नकारं तु मुखं पूर्वमादित्योदयसन्निभम् । सकृद्ध्यात्वा द्विजश्रेष्ठ सगच्छेदैश्वरं परम् ॥ २० ॥ नीलोत्पलदलश्यामं प्रकारं दक्षिणाननम् । सकृद्ध्यात्वा द्विजश्रेष्ठ सगच्छेद्वैष्णवं पदम् ॥ २१ ॥ श्वेतवर्णं तु तत्पीतं चोकारं पश्चिमाननम् । सकृद्ध्यात्वा द्विजश्रेष्ठ रुद्रेण सहमोदते ॥ २२ ॥ शुक्लवर्णेन्दुसङ्काशं दकारं चोत्तराननम् । सकृद्ध्यात्वा द्विजश्रेष्ठ सगच्छेद्ब्रह्मणःपदम् ॥ २३ ॥ यात्कारस्तु शिरः प्रोक्तश्चतुर्थवदनप्रभः । प्रत्यक्ष फलदो ब्रह्मा विष्णु रुद्रात्मकः स्मृतः ॥ २४ ॥ एवं ध्यात्वा तु मेधावी जपं होमं करोति यः । न भवेत्पातकं तस्य अमृतं किं न विद्यते । साक्षाद्भवत्यसौ ब्रह्मा स्वयम्भूः परमेश्वरः ॥ २५ ॥