Sri Dakshina Kali Hrudayam Mahakautuhalam – श्री दक्षिणकाली हृदय स्तोत्रम् (महाकौतूहलम्)

॥ श्री गणेशाय नमः ॥ ॥ श्री दक्षिणकाली हृदय स्तोत्रम् (महाकौतूहलम्) ॥ ॥ श्रीमहाकाल उवाच ॥ महाकौतूहलस्तोत्रं हृदयाख्यं महोत्तमम् । शृणु प्रिये महागोप्यं दक्षिणायाः सुगोपितम् ॥ १ ॥ अवाच्यमपि वक्ष्यामि तव प्रीत्या प्रकाशितम् । अन्येभ्यः कुरु गोप्यं च सत्यं सत्यं च शैलजे ॥ २ ॥ ॥ श्रीदेव्युवाच ॥ कस्मिन् युगे समुत्पन्नं केन स्तोत्रं कृतं पुरा । तत्सर्वं कथ्यतां शम्भो महेश्वर दयानिधे ॥ ३ ॥ ॥ श्रीमहाकाल उवाच ॥ पुरा प्रजापतेः शीर्षच्छेदनं कृतवानहम् । ब्रह्महत्याकृतैः पापैर्भैरवत्वं ममागतम् ॥ ४ ॥ ब्रह्महत्या विनाशाय कृतं स्तोत्रं मया प्रिये । कृत्यारिनाशकं स्तोत्रं ब्रह्महत्यापहारकम् ॥ ५ ॥ ॥ मन्त्र विनियोगः ॥ अस्य श्री दक्षिणकाली हृदय स्तोत्र मन्त्रस्य श्रीमहाकाल ऋषिः उष्णिक् छन्दः श्रीदक्षिणकालिका देवता क्रीं बीजं ह्रीं शक्तिः नमः कीलकं सर्वपापक्षयार्थे जपे विनियोगः ॥ ॥ करन्यासः ॥ ॐ क्रां अङ्गुष्ठाभ्यां नमः । ॐ क्रीं तर्जनीभ्यां नमः । ॐ क्रूं मध्यमाभ्यां नमः । ॐ क्रैं अनामिकाभ्यां नमः । ॐ क्रौं कनिष्ठिकाभ्यां नमः । ॐ क्रः करतलकरपृष्ठाभ्यां नमः । ॥ हृदयादि न्यासः ॥ ॐ क्रां हृदयाय नमः । ॐ क्रीं शिरसे स्वाहा । ॐ क्रूं शिखायै वषट् । ॐ क्रैं कवचाय हुम् । ॐ क्रौं नेत्रत्रयाय वौषट् । ॐ क्रः अस्त्राय फट् । ॥ ध्यानम् ॥ ध्यायेत्कालीं महामायां त्रिनेत्रां बहुरूपिणीम् । चतुर्भुजां ललज्जिह्वां पूर्णचन्द्रनिभाननाम् ॥ १ ॥ नीलोत्पलदलप्रख्यां शत्रुसङ्घविदारिणीम् । वर मुण्डं तथा खड्गं मुसलं वरदं तथा ॥ २ ॥ बिभ्राणां रक्तवदनां दंष्ट्रालीं घोररूपिणीम् । अट्‍टाट्‍टहासनिरतां सर्वदा च दिगम्बराम् ॥ ३ ॥ शवासनस्थितां देवीं मुण्डमालाविभूषिताम् । इति ध्यात्वा महादेवीं ततस्तु हृदयं पठेत् ॥ ४ ॥ ॥ अथ हृदय स्तोत्रम् ॥ कालिका घोररूपाढ्या सर्वकामफलप्रदा । सर्वदेवस्तुता देवी शत्रुनाशं करोतु मे ॥ ५ ॥ ह्रीं ह्रीं स्वरूपिणी श्रेष्ठा त्रिषुलोकेषु दुर्लभा । तव स्नेहान्मयाख्यातं न देयं यस्य कस्यचित् ॥ ६ ॥ अथ ध्यानम् प्रवक्ष्यामि निशामय परात्मिके । यस्य विज्ञानमात्रेण जीवन्मुक्तो भविष्यति ॥ ७ ॥ नागयज्ञोपवीतां च चन्द्रार्धकृतशेखराम् । जटाजूटां च सञ्चिन्त्य महाकालसमीपगाम् ॥ ८ ॥ एवं न्यासादयः सर्वे ये प्रकुर्वन्ति मानवाः । प्राप्नुवन्ति च ते मोक्षं सत्यं सत्यं वरानने ॥ ९ ॥ ॥ यन्त्र विवरण ॥ यन्त्रं शृणु परं देव्याः सर्वाभीष्टप्रदायकम् । गोप्याद्गोप्यतरं गोप्यं गोप्याद्गोप्यतरं महत् ॥ १० ॥ त्रिकोणं पञ्चकं चाष्टकमलं भूपुरान्वितम् । मुण्डपङ्क्तिं च ज्वालं च कालीयन्त्रं सुसिद्धिदम् ॥ ११ ॥ मन्त्रं तु पूर्वं कथितं धारयस्व सदा प्रिये । देव्या दक्षिणकाल्यास्तु नाम मालां निशामय ॥ १२ ॥ ॥ नाममाला ॥ काली दक्षिणकाली च कृष्णरूपा परात्मिका । मुण्डमाली विशालाक्षी सृष्टिसंहारकारिणी ॥ १३ ॥ स्थितिरूपा महामाया योगनिद्रा भगात्मिका । भगसर्पिः पानरता भगध्येया भगाङ्गजा ॥ १४ ॥ आद्या सदा नवा घोरा महातेजाः करालिका । प्रेतवाहा सिद्धिलक्ष्मीरनिरुद्धा सरस्वती ॥ १५ ॥ नामान्येतानि सुभगे ये पठन्ति दिने दिने । तेषां दासस्य दासोऽहं सत्यं सत्यं महेश्वरि ॥ १६ ॥ ॐ । कालीं कालहरां देवीं कङ्कालीं बीजरूपिणीम् । कालरूपां कलातीतां कालिकां दक्षिणां भजे ॥ १७ ॥ कुण्डगोलप्रियां देवीं स्वयम्भू कुसुमे रताम् । रतिप्रियां महारौद्रीं कालिकां प्रणमाम्यहम् ॥ १८ ॥ दूतीप्रियां महादूतीं दूतीयोगेश्वरीं पराम् । दूतीयोगोद्भवरतां दूतीरूपां नमाम्यहम् ॥ १९ ॥ ॥ मन्त्र प्रयोग ॥ क्रीं मन्त्रेण जलं जप्त्वा सप्तधा सेचनेन तु । सर्वेरोगाः विनश्यन्ति नात्र कार्या विचारणा ॥ २० ॥ क्रीं स्वाहान्तैर्महामन्त्रैश्चन्दनं साधयेत्ततः । तिलकं क्रियते प्राज्ञैर्लोकोवश्यो भवेत्सदा ॥ २१ ॥ क्रीं हूं ह्रीं मन्त्रजप्तैश्च ह्यक्षतैः सप्तभिः प्रिये । महाभयविनाशश्च जायते नात्र संशयः ॥ २२ ॥ क्रीं ह्रीं हूं स्वाहा मन्त्रेण श्मशाने भस्म मन्त्रयेत् । शत्रोर्गृहे प्रतिक्षिप्त्वा शत्रोर्मृत्युर्भविष्यति ॥ २३ ॥ हूं ह्रीं क्रीं चैव उच्चाटे पुष्पं संशोध्य सप्तधा । रिपूणां चैव चोच्चाटं नयत्येव न संशयः ॥ २४ ॥ आकर्षणे च क्रीं क्रीं क्रीं जप्त्वाक्षतान् प्रतिक्षिपेत् । सहस्रयोजनस्था च शीघ्रमागच्छति प्रिये ॥ २५ ॥ क्रीं क्रीं क्रीं ह्रूं ह्रूं ह्रीं ह्रीं च कज्जलं शोधितं तथा । तिलकेन जगन्मोहः सप्तधा मन्त्रमाचरेत् ॥ २६ ॥ ॥ फलश्रुति ॥ हृदयं परमेशानि सर्वपापहरं परम् । अश्वमेधादियज्ञानां कोटि कोटि गुणोत्तरम् ॥ २७ ॥ कन्यादानादि दानानां कोटि कोटिगुणं फलम् । दूतीयागादि यागानां कोटि कोटि फलं स्मृतम् ॥ २८ ॥ गङ्गादि सर्वतीर्थानां फलं कोटिगुणं स्मृतम् । एकधा पाठमात्रेण सत्यं सत्यं मयोदितम् ॥ २९ ॥ कौमारीस्वेष्टरूपेण पूजां कृत्वा विधानतः । पठेत्‍ स्तोत्रं महेशानि जीवन्मुक्तः स उच्यते ॥ ३० ॥ रजस्वलाभगं दृष्ट्वा पठेदेकाग्रमानसः । लभते परमं स्थानं देवीलोके वरानने ॥ ३१ ॥ महादुःखे महारोगे महासङ्कटके दिने । महाभये महाघोरे पठेत्‍ स्तोत्रं महोत्तमम् । सत्यं सत्यं पुनः सत्यं गोपयेन्मातृजारवत् ॥ ३२ ॥ ॥ इति महाकौतूहलं नाम श्री दक्षिणकाली हृदय स्तोत्रम् सम्पूर्णम् ॥