Sri Bala Vanchadatri Stotram – श्री बाला वाञ्छादात्री स्तोत्रम्

॥ श्री बाला वाञ्छादात्री स्तोत्रम् ॥ ॥ वाङ्मयसिद्धि ध्यानम् ॥ विद्याक्षमालासुकपालमुद्रा- -राजत्करां कुन्दसमानकान्तिम् । मुक्ताफलालङ्कृतशोभनाङ्गीं बालां भजे वाङ्मयसिद्धिहेतोः ॥ १ ॥ ॥ कल्पवृक्ष ध्यानम् ॥ भजे कल्पवृक्षाध उद्दीप्तरत्ना- -ऽऽसने सन्निषण्णां मदाघूर्णिताक्षीम् । करैर्बीजपूरं कपालेषुचापं सपाशाङ्कुशां रक्तवर्णां दधानाम् ॥ २ ॥ ॥ चिद्रूपिणी ध्यानम् ॥ व्याख्यानमुद्रामृतकुम्भविद्यां अक्षस्रजं सन्दधतीं कराब्जैः । चिद्रूपिणीं शारदचन्द्रकान्तिं बालां भजे मौक्तिकभूषिताङ्गीम् ॥ ३ ॥ ॥ त्रिपुरा ध्यानम् ॥ पाशाङ्कुशौ पुस्तकमक्षसूत्रं करैर्दधानां सकलामरार्च्याम् । रक्तां त्रिणेत्रां शशिशेखरां तां भजेऽखिलर्घ्यै त्रिपुरां च बालाम् ॥ ४ ॥ ॥ रूपसम्पत्ति ध्यानम् ॥ आरक्तां शशिखण्डमण्डितजटाजूटानुबद्धस्रजं बन्धूकप्रसवारुणाम्बरधरां रक्ताम्बुजाध्यासिनीम् । त्वां ध्यायामि चतुर्भुजां त्रिणयनामापीनरम्यस्तनीं मध्ये निम्नवलित्रयाङ्किततनुं त्वद्रूपसम्पत्तये ॥ ५ ॥ ॥ त्रिबीज सूक्ष्मपद ध्यानम् ॥ आधारे तरुणार्कबिम्बरुचिरं सोमप्रभं वाग्भवं बीजं मन्मथमिन्द्रगोपकनिभं हृत्पङ्कजे संस्थितम् । रन्ध्रे ब्रह्मपदे च शाक्तमपरं चन्द्रप्रभाभासुरं ये ध्यायन्ति पदत्रयं तव शिवे ते यान्ति सूक्ष्मं पदम् ॥ ६ ॥ ॥ अरुणाम्बुजस्था ध्यानम् ॥ रक्ताम्बरां चन्द्रकलावतंसां समुद्यदादित्यनिभां त्रिणेत्राम् । विद्याक्षमालाभयदानहस्तां ध्यायामि बालामरुणाम्बुजस्थाम् ॥ ७ ॥ ॥ परमा कला ध्यानम् ॥ अकलङ्कशशाङ्काभा त्र्यक्षा चन्द्रकलावती । मुद्रापुस्तलसद्बाहा पातु मां परमा कला ॥ ८ ॥ ॥ धनसिद्धि ध्यानम् ॥ मातुलिङ्गपयोजन्महस्तां कनकसन्निभाम् । पद्मासनगतां बालां ध्यायामि धनसिद्धये ॥ ९ ॥ ॥ ज्ञानप्राप्ति ध्यानम् ॥ वरपीयूषकलशपुस्तकाभीतिधारिणीम् । सुधां स्रवन्तीं ज्ञानाप्त्यै ब्रह्मरन्ध्रे विचिन्तये ॥ १० ॥ ॥ आरोग्य ध्यानम् ॥ शुक्लाम्बरां शशाङ्काभां ध्यायाम्यारोग्यदायिनीम् । सृणिपाशधरां देवीं रत्नालङ्कारभूषिताम् ॥ ११ ॥ ॥ सौमनस्य ध्यानम् ॥ अकारादिक्षकारान्तवर्णावयवशालिनीम् । प्रसन्नामरुणामीक्षे सौमनस्यप्रदां शिवाम् ॥ १२ ॥ ॥ वागीश्वरी ध्यानम् ॥ पुस्तकजपवटहस्ते वरदाभयचिह्नबाहुलते । कर्पूरामलदेहे वागीश्वरि चोदयाशु मम चेतः ॥ १३ ॥ ॥ इति श्री बाला वाञ्छादात्री स्तोत्रम् सम्पूर्णम् ॥