श्री सूर्य स्तुतिः (ब्रह्म कृतम्) – Brahma Kruta Surya Stuti

॥ श्री सूर्य स्तुतिः (ब्रह्म कृतम्) ॥ ॥ श्री ब्रह्म पुराणे एकत्रिंशोऽध्याये ॥ ब्रह्मोवाच । आदिदेवोऽसि देवानामैश्वर्याच्च त्वमीश्वरः । आदिकर्ताऽसि भूतानां देवदेवो दिवाकरः ॥ १ ॥ जीवनः सर्वभूतानां देवगन्धर्वरक्षसाम् । मुनिकिन्नरसिद्धानां तथैवोरगपक्षिणाम् ॥ २ ॥ ॥ त्रिमूर्ति स्वरूप ॥ त्वं ब्रह्मा त्वं महादेवस्त्वं विष्णुस्त्वं प्रजापतिः । वायुरिन्द्रश्च सोमश्च विवस्वान् वरुणस्तथा ॥ ३ ॥ त्वं कालः सृष्टिकर्ता च हर्ता भर्ता तथा प्रभुः । सरितः सागराः शैला विद्युदिन्द्रधनूंषि च ॥ ४ ॥ ॥ परमात्म स्वरूप ॥ प्रलयः प्रभवश्चैव व्यक्ताव्यक्तः सनातनः । ईश्वरात्परतो विद्या विद्यायाः परतः शिवः ॥ ५ ॥ शिवात्परतरो देवस्त्वमेव परमेश्वरः । सर्वतः पाणिपादान्तः सर्वतोक्षिशिरोमुखः ॥ ६ ॥ ॥ सहस्रांशु स्वरूप ॥ सहस्रांशुः सहस्रास्यः सहस्रचरणेक्षणः । भूतादिर्भूर्भुवः स्वश्च महः सत्यं तपो जनः ॥ ७ ॥ ॥ दुर्निरीक्ष्य रूप ॥ प्रदीप्तं दीपनं दिव्यं सर्वलोकप्रकाशकम् । दुर्निरीक्ष्यं सुरेन्द्राणां यद्रूपं तस्य ते नमः ॥ ८ ॥ सुरसिद्धगणैर्जुष्टं भृग्वत्रिपुलहादिभिः । स्तुतस्य परमव्यक्तं यद्रूपं तस्य ते नमः ॥ ९ ॥ वेद्यं वेदविदां नित्यं सर्वज्ञानसमन्वितम् । सर्वदेवाधिदेवस्य यद्रूपं तस्य ते नमः ॥ १० ॥ विश्वकृद्विश्वभूतं च वैश्वानरसुरार्चितम् । विश्वस्थितमवेद्यं च यद्रूपं तस्य ते नमः ॥ ११ ॥ ॥ परमात्मा ॥ परं यज्ञात्परं वेदात्परं लोकात्परं दिवः । परमात्मेत्यभिख्यातं यद्रूपं तस्य ते नमः ॥ १२ ॥ अविज्ञेयमनालक्ष्यमध्यानगतमव्ययम् । अनादिनिधनं चैव यद्रूपं तस्य ते नमः ॥ १३ ॥ ॥ अष्ट नमस्कार ॥ नमो नमः कारणकारणाय नमो नमः पापविमोचनाय । नमो नमस्तेऽदितिवन्दिताय नमो नमो रोगविनाशनाय ॥ १४ ॥ नमो नमः सर्ववरप्रदाय नमो नमः सर्वसुखप्रदाय । नमो नमः सर्वधनप्रदाय नमो नमः सर्वमतिप्रदाय ॥ १५ ॥ ॥ इति श्रीब्रह्मपुराणे एकत्रिंशोऽध्याये ब्रह्मकृत सूर्य स्तुतिः सम्पूर्णम् ॥