Sri Sharva Stuti (Krishna Arjuna Krutam) – श्री शर्व स्तुतिः (कृष्णार्जुन कृतम्)

कृष्णार्जुनावूचतुः । नमो भवाय शर्वाय रुद्राय वरदाय च । पशूनां पतये नित्यमुग्राय च कपर्दिने । महादेवाय भीमाय त्र्यम्बकाय च शान्तये ॥ १ ॥ ईशानाय भगघ्नाय नमोऽस्त्वन्धकघातिने । कुमारगुरवे तुभ्यं नीलग्रीवाय वेधसे ॥ २ ॥ पिनाकिने हविष्याय सत्याय विभवे सदा । विलोहिताय धूम्राय व्याधाय नपराजिते ॥ ३ ॥ नित्यं नीलशिखण्डाय शूलिने दिव्यचक्षुषे । होत्रे पोत्रे त्रिनेत्राय व्याधये वसुरेतसे ॥ ४ ॥ अचिन्त्यायाम्बिकाभर्त्रे सर्वदेवस्तुताय च । वृषध्वजाय मुण्डाय जटिने ब्रह्मचारिणे ॥ ५ ॥ तप्यमानाय सलिले ब्रह्मण्यायाजिताय च । विश्वात्मने विश्वसृजे विश्वमावृत्य तिष्ठते ॥ ६ ॥ नमो नमस्ते सेव्याय भूतानां प्रभवे सदा । ब्रह्मवक्त्राय सर्वाय शङ्कराय शिवाय च ॥ ७ ॥ नमोऽस्तु वाचस्पतये प्रजानां पतये नमः । नमो विश्वस्य पतये महतां पतये नमः ॥ ८ ॥ नमः सहस्रशिरसे सहस्रभुजमन्यवे । सहस्रनेत्रपादाय नमोऽसङ्ख्येयकर्मणे ॥ ९ ॥ नमो हिरण्यवर्णाय हिरण्यकवचाय च । भक्तानुकम्पिने नित्यं सिद्ध्यतां नो वरः प्रभो ॥ १० ॥ इति श्रीमन्महाभारते द्रोणपर्वणि अर्जुनस्वप्नदर्शने अशीतितमोऽध्याये शर्व स्तुतिः ॥ इतर पश्यतु ।