Sri Shani Stotram (Dasaratha Kritam) – श्री शनैश्चर स्तोत्रम् (दशरथ कृतम्)

॥ श्री शनैश्चर स्तोत्रम् (दशरथ कृतम्) ॥ ॥ स्तोत्र प्रारम्भ ॥ ध्यात्वा सरस्वतीं देवीं गणनाथं विनायकम् । राजा दशरथः स्तोत्रं सौरेरिदमथाकरोत् ॥ १ ॥ ॥ दशरथ उवाच ॥ नमः कृष्णाय नीलाय शितिकण्ठनिभाय च । नमो नीलमयूखाय नीलोत्पलनिभाय च ॥ २ ॥ नमो निर्मांसदेहाय दीर्घश्मश्रुजटाय च । नमो विशालनेत्राय शुष्कोदर भयानक ॥ ३ ॥ नमः परुषगात्राय स्थूलरोमाय वै नमः । नमो नित्यं क्षुधार्ताय नित्यतप्ताय वै नमः ॥ ४ ॥ नमः कालाग्निरूपाय कृतान्तक नमोऽस्तु ते । नमस्ते कोटराक्षाय दुर्निरीक्ष्याय वै नमः ॥ ५ ॥ नमो घोराय रौद्राय भीषणाय करालिने । नमस्ते सर्वभक्षाय वलीमुख नमोऽस्तु ते ॥ ६ ॥ सूर्यपुत्र नमस्तेऽस्तु भास्करे भयदायक । अधोदृष्टे नमस्तुभ्यं वपुःश्याम नमोऽस्तु ते ॥ ७ ॥ नमो मन्दगते तुभ्यं निस्त्रिंशाय नमो नमः । तपसा दग्धदेहाय नित्ययोगरताय च ॥ ८ ॥ ॥ शनि का प्रभाव ॥ नमस्ते ज्ञाननेत्राय काश्यपात्मजसूनवे । तुष्टो ददासि वै राज्यं रुष्टो हरसि तत्‍ क्षणात् ॥ ९ ॥ देवासुरमनुष्याश्च पशुपक्षिसरीसृपाः । त्वया विलोकिताः सौरे दैन्यमाशु व्रजन्ति च ॥ १० ॥ ब्रह्मा शक्रो यमश्चैव ऋषयः सप्ततारकाः । राज्यभ्रष्टाश्च ते सर्वे तव दृष्ट्या विलोकिताः ॥ ११ ॥ देशा नगरग्रामाश्च द्वीपाश्चैवाद्रयस्तथा । रौद्रदृष्ट्या तु ये दृष्टाः क्षयं गच्छन्ति तत् क्षणात् ॥ १२ ॥ ॥ प्रार्थना ॥ प्रसादं कुरु मे सौरे वरार्थेऽहं तवाश्रितः । सौरे क्षमस्वापराधं सर्वभूतहिताय च ॥ १३ ॥ ॥ इति दशरथ कृत श्री शनैश्चर स्तोत्रम् सम्पूर्णम् ॥