Sri Shani Sahasranama Stotram – श्री शनैश्चर सहस्रनाम स्तोत्रम्

॥ श्री शनैश्चर सहस्रनाम स्तोत्रम् ॥ ॥ विनियोगः ॥ अस्य श्रीशनैश्चर सहस्रनामस्तोत्र महामन्त्रस्य, काश्यप ऋषिः, अनुष्टुप् छन्दः, शनैश्चरो देवता, शं बीजं, नं शक्तिः, मं कीलकं, शनैश्चरप्रसाद सिद्ध्यर्थे जपे विनियोगः ॥ ॥ करन्यासः ॥ शनैश्चराय अङ्गुष्ठाभ्यां नमः । मन्दगतये तर्जनीभ्यां नमः । अधोक्षजाय मध्यमाभ्यां नमः । सौरये अनामिकाभ्यां नमः । शुष्कोदराय कनिष्ठिकाभ्यां नमः । छायात्मजाय करतलकरपृष्ठाभ्यां नमः । ॥ हृदयादिन्यासः ॥ शनैश्चराय हृदयाय नमः । मन्दगतये शिरसे स्वाहा । अधोक्षजाय शिखायै वषट् । सौरये कवचाय हुम् । शुष्कोदराय नेत्रत्रयाय वौषट् । छायात्मजाय अस्त्राय फट् । भूर्भुवस्सुवरोमिति दिग्बन्धः । ॥ ध्यानम् ॥ चापासनो गृध्रधरस्तु नीलः प्रत्यङ्मुखः काश्यप गोत्रजातः । सशूलचापेषु गदाधरोऽव्यात् सौराष्ट्रदेशप्रभवश्च शौरिः ॥ नीलाम्बरो नीलवपुः किरीटी गृध्रासनस्थो विकृताननश्च । केयूरहारादिविभूषिताङ्गः सदाऽस्तु मे मन्दगतिः प्रसन्नः ॥ ॥ स्तोत्रम् ॥ ओम् ॥ अमिताभाष्यघहरः अशेषदुरितापहः । अघोररूपोऽतिदीर्घकायोऽशेषभयानकः ॥ १ ॥ अनन्तो अन्नदाता चाऽश्वत्थमूलजपे प्रियः । अतिसम्पत्प्रदोऽमोघः अन्यस्तुत्या प्रकोपितः ॥ २ ॥ अपराजितोऽद्वितीयः अतितेजोऽभयप्रदः । अष्टमस्थोऽञ्जननिभः अखिलात्मार्कनन्दनः ॥ ३ ॥ अतिदारुण अक्षोभ्यः अप्सरोभिः प्रपूजितः । अभीष्टफलदोऽरिष्टमथनोऽमरपूजितः ॥ ४ ॥ अनुग्राह्यो अप्रमेय पराक्रम विभीषणः । असाध्ययोगो अखिलदोषघ्नः अपराकृतः ॥ ५ ॥ अप्रमेयोऽतिसुखदः अमराधिपपूजितः । अवलोकात् सर्वनाशः अश्वत्थाम द्विरायुधः ॥ ६ ॥ अपराधसहिष्णुश्च अश्वत्थामसुपूजितः । अनन्तपुण्यफलदो अतृप्तोऽतिबलोऽपि च ॥ ७ ॥ अवलोकात् सर्ववन्द्यः अक्षीणकरुणानिधिः । अविद्यामूलनाशश्च अक्षय्यफलदायकः ॥ ८ ॥ आनन्दपरिपूर्णश्च आयुष्कारक एव च । आश्रितेष्टार्थवरदः आधिव्याधिहरोऽपि च ॥ ९ ॥ आनन्दमय आनन्दकरो आयुधधारकः । आत्मचक्राधिकारी च आत्मस्तुत्यपरायणः ॥ १० ॥ आयुष्करो आनुपूर्व्यः आत्मायत्तजगत्त्रयः । आत्मनामजपप्रीतः आत्माधिकफलप्रदः ॥ ११ ॥ आदित्यसम्भवो आर्तिभञ्जनो आत्मरक्षकः । आपद्बान्धव आनन्दरूपो आयुःप्रदोऽपि च ॥ १२ ॥ आकर्णपूर्णचापश्च आत्मोद्दिष्ट द्विजप्रदः । आनुकूल्यो आत्मरूपप्रतिमादानसुप्रियः ॥ १३ ॥ आत्मारामो आदिदेवो आपन्नार्तिविनाशनः । इन्दिरार्चितपादश्च इन्द्रभोगफलप्रदः ॥ १४ ॥ इन्द्रदेवस्वरूपश्च इष्टेष्टवरदायकः । इष्टापूर्तिप्रदो इन्दुमतीष्टवरदायकः ॥ १५ ॥ इन्दिरारमणः प्रीतः इन्द्रवंशनृपार्चितः । इहामुत्रेष्टफलद इन्दिरारमणार्चितः ॥ १६ ॥ ईन्द्रियो ईश्वरप्रीतः ईषणात्रयवर्जितः । उमास्वरूप उद्बोध्यः उशना उत्सवप्रियः ॥ १७ ॥ उमादेव्यर्चनप्रीतः उच्चस्थोच्चफलप्रदः । उरुप्रकाशो उच्चस्थयोगदः उरुपराक्रमः ॥ १८ ॥ ऊर्ध्वलोकादिसञ्चारी ऊर्ध्वलोकादिनायकः । ऊर्जस्वी ऊनपादश्च ऋकाराक्षरपूजितः ॥ १९ ॥ ऋषिप्रोक्त पुराणज्ञः ऋषिभिः परिपूजितः । ऋग्वेदवन्द्यो ऋग्रूपी ऋजुमार्गप्रवर्तकः ॥ २० ॥ लुलितोद्धारको लूतभवपाशप्रभञ्जनः । लूकाररूपको लब्धधर्ममार्गप्रवर्तकः ॥ २१ ॥ एकाधिपत्यसाम्राज्यप्रदो एनौघनाशनः । एकपाद्येक एकोनविंशतिमासभुक्तिदः ॥ २२ ॥ एकोनविंशतिवर्षदशो एणाङ्कपूजितः । ऐश्वर्यफलदो ऐन्द्र ऐरावतसुपूजितः ॥ २३ ॥ ओङ्कारजपसुप्रीत ओङ्कारपरिपूजितः । ओङ्कारबीजो औदार्यहस्तो औन्नत्यदायकः ॥ २४ ॥ औदार्यगुण औदार्यशीलो औषधकारकः । करपङ्कजसन्नद्धधनुश्च करुणानिधिः ॥ २५ ॥ कालः कठिनचित्तश्च कालमेघसमप्रभः । किरीटी कर्मकृत् कारयिता कालसहोदरः ॥ २६ ॥ कालाम्बरः काकवाहः कर्मठः काश्यपान्वयः । कालचक्रप्रभेदी च कालरूपी च कारणः ॥ २७ ॥ कारिमूर्तिः कालभर्ता किरीटमकुटोज्वलः । कार्यकारण कालज्ञः काञ्चनाभरथान्वितः ॥ २८ ॥ कालदंष्ट्रः क्रोधरूपः कराली कृष्णकेतनः । कालात्मा कालकर्ता च कृतान्तः कृष्णगोप्रियः ॥ २९ ॥ कालाग्निरुद्ररूपश्च काश्यपात्मजसम्भवः । कृष्णवर्णहयश्चैव कृष्णगोक्षीरसुप्रियः ॥ ३० ॥ कृष्णगोघृतसुप्रीतः कृष्णगोदधिषुप्रियः । कृष्णगावैकचित्तश्च कृष्णगोदानसुप्रियः ॥ ३१ ॥ कृष्णगोदत्तहृदयः कृष्णगोरक्षणप्रियः । कृष्णगोग्रासचित्तस्य सर्वपीडानिवारकः ॥ ३२ ॥ कृष्णगोदान शान्तस्य सर्वशान्तफलप्रदः । कृष्णगोस्नान कामस्य गङ्गास्नानफलप्रदः ॥ ३३ ॥ कृष्णगोरक्षणस्याशु सर्वाभीष्टफलप्रदः । कृष्णगावप्रियश्चैव कपिलापशुषु प्रियः ॥ ३४ ॥ कपिलाक्षीरपानस्य सोमपानफलप्रदः । कपिलादानसुप्रीतः कपिलाज्यहुतप्रियः ॥ ३५ ॥ कृष्णश्च कृत्तिकान्तस्थः कृष्णगोवत्ससुप्रियः । कृष्णमाल्याम्बरधरः कृष्णवर्णतनूरुहः ॥ ३६ ॥ कृष्णकेतुः कृशकृष्णदेहः कृष्णाम्बरप्रियः । क्रूरचेष्टः क्रूरभावः क्रूरदंष्ट्रः कुरूपि च ॥ ३७ ॥ कमलापतिसंसेव्यः कमलोद्भवपूजितः । कामितार्थप्रदः कामधेनुपूजनसुप्रियः ॥ ३८ ॥ कामधेनुसमाराध्यः कृपायुषविवर्धनः । कामधेन्वैकचित्तश्च कृपराजसुपूजितः ॥ ३९ ॥ कामदोग्धा च क्रुद्धश्च कुरुवंशसुपूजितः । कृष्णाङ्गमहिषीदोग्धा कृष्णेन कृतपूजनः ॥ ४० ॥ कृष्णाङ्गमहिषीदानप्रियः कोणस्थ एव च । कृष्णाङ्गमहिषीदानलोलुपः कामपूजितः ॥ ४१ ॥ क्रूरावलोकनात्सर्वनाशः कृष्णाङ्गदप्रियः । खद्योतः खण्डनः खड्गधरः खेचरपूजितः ॥ ४२ ॥ खरांशुतनयश्चैव खगानां पतिवाहनः । गोसवासक्तहृदयो गोचरस्थानदोषहृत् ॥ ४३ ॥ गृहराश्याधिपश्चैव गृहराजमहाबलः । गृध्रवाहो गृहपतिर्गोचरो गानलोलुपः ॥ ४४ ॥ घोरो घर्मो घनतमो घर्मी घनकृपान्वितः । घननीलाम्बरधरो ङादिवर्णसुसञ्ज्ञितः ॥ ४५ ॥ चक्रवर्तिसमाराध्यश्चन्द्रमत्यासमर्चितः । चन्द्रमत्यार्तिहारी च चराचरसुखप्रदः ॥ ४६ ॥ चतुर्भुजश्चापहस्तश्चराचरहितप्रदः । छायापुत्रश्छत्रधरश्छायादेवीसुतस्तथा ॥ ४७ ॥ जयप्रदो जगन्नीलो जपतां सर्वसिद्धिदः । जपविध्वस्तविमुखो जम्भारिपरिपूजितः ॥ ४८ ॥ जम्भारिवन्द्यो जयदो जगज्जनमनोहरः । जगत्त्रयप्रकुपितो जगत्त्राणपरायणः ॥ ४९ ॥ जयो जयप्रदश्चैव जगदानन्दकारकः । ज्योतिश्च ज्योतिषां श्रेष्ठो ज्योतिःशास्त्रप्रवर्तकः ॥ ५० ॥ झर्झरीकृतदेहश्च झल्लरीवाद्यसुप्रियः । ज्ञानमूर्तिर्ज्ञानगम्यो ज्ञानी ज्ञानमहानिधिः ॥ ५१ ॥ ज्ञानप्रबोधकश्चैव ज्ञानदृष्ट्यावलोकितः । टङ्किताखिललोकश्च टङ्कितैनस्तमोरविः ॥ ५२ ॥ टङ्कारकारकश्चैव टङ्कृतो टाम्भदप्रियः । ठकारमय सर्वस्वष्ठकारकृतपूजितः ॥ ५३ ॥ ढक्कावाद्यप्रीतिकरो डमड्डमरुकप्रियः । डम्बरप्रभवो डम्भो ढक्कानादप्रियङ्करः ॥ ५४ ॥ डाकिनीशाकिनीभूतसर्वोपद्रवकारकः । डाकिनीशाकिनीभूतसर्वोपद्रवनाशकः ॥ ५५ ॥ ढकाररूपो ढाम्भीको णकारजपसुप्रियः । णकारमयमन्त्रार्थः णकारैकशिरोमणिः ॥ ५६ ॥ णकारवचनानन्दः णकारकरुणामयः । णकारमयसर्वस्वः णकारैकपरायणः ॥ ५७ ॥ तर्जनीधृतमुद्रश्च तपसां फलदायकः । त्रिविक्रमनुतश्चैव त्रयीमयवपुर्धरः ॥ ५८ ॥ तपस्वी तपसादग्धदेहस्ताम्राधरस्तथा । त्रिकालवेदितव्यश्च त्रिकालमतितोषितः ॥ ५९ ॥ तुलोच्चयस्त्रासकरस्तिलतैलप्रियस्तथा । तिलान्नसन्तुष्टमनास्तिलदानप्रियस्तथा ॥ ६० ॥ तिलभक्ष्यप्रियश्चैव तिलचूर्णप्रियस्तथा । तिलखण्डप्रियश्चैव तिलापूपप्रियस्तथा ॥ ६१ ॥ तिलहोमप्रियश्चैव तापत्रयनिवारकः । तिलतर्पणसन्तुष्टस्तिलतैलान्नतोषितः ॥ ६२ ॥ तिलैकदत्तहृदयस्तेजस्वी तेजसान्निधिः । तेजसादित्यसङ्काशस्तेजोमय वपुर्धरः ॥ ६३ ॥ तत्त्वज्ञस्तत्त्वगस्तीव्रस्तपोरूपस्तपोमयः । तुष्टिदस्तुष्टिकृत् तीक्ष्णस्त्रिमूर्तिस्त्रिगुणात्मकः ॥ ६४ ॥ तिलदीपप्रियश्चैव तस्य पीडानिवारकः । तिलोत्तमामेनकादिनर्तनप्रिय एव च ॥ ६५ ॥ त्रिभागमष्टवर्गश्च स्थूलरोमा स्थिरस्तथा । स्थितः स्थायी स्थापकश्च स्थूलसूक्ष्मप्रदर्शकः ॥ ६६ ॥ दशरथार्चितपादश्च दशरथस्तोत्रतोषितः । दशरथप्रार्थनाक्लुप्त दुर्भिक्षविनिवारकः ॥ ६७ ॥ दशरथप्रार्थनाक्लुप्तवरद्वयप्रदायकः । दशरथस्वात्मदर्शी च दशरथाभीष्टदायकः ॥ ६८ ॥ दोर्भिर्धनुर्धरश्चैव दीर्घश्मश्रुजटाधरः । दशरथस्तोत्रवरदो दशरथाभीप्सितप्रदः ॥ ६९ ॥ दशरथस्तोत्रसन्तुष्टो दशरथेनसुपूजितः । द्वादशाष्टमजन्मस्थो देवपुङ्गवपूजितः ॥ ७० ॥ देवदानवदर्पघ्नो दिनं प्रतिमुनिस्तुतः । द्वादशस्थो द्वादशात्मा सुतो द्वादशनामभृत् ॥ ७१ ॥ द्वितीयस्थो द्वादशार्कसूनुर्दैवज्ञपूजितः । दैवज्ञचित्तवासी च दमयन्त्या सुपूजितः ॥ ७२ ॥ द्वादशाब्दन्तु दुर्भिक्षकारी दुःस्वप्ननाशनः । दुराराध्यो दुराधर्षो दमयन्तीवरप्रदः ॥ ७३ ॥ दुष्टदूरो दुराचारशमनो दोषवर्जितः । दुस्सहो दोषहन्ता च दुर्लभो दुर्गमस्तथा ॥ ७४ ॥ दुःखप्रदो दुःखहन्ता दीप्तरञ्जित दिङ्मुखः । दीप्यमानमुखाम्भोजः दमयन्त्याः शिवप्रदः ॥ ७५ ॥ दुर्निरीक्ष्यो दृष्टमात्रदैत्यमण्डलनाशकः । द्विजदानैकनिरतो द्विजाराधनतत्परः ॥ ७६ ॥ द्विजसर्वार्तिहारी च द्विजराजसमर्चितः । द्विजदानैकचित्तश्च द्विजराजप्रियङ्करः ॥ ७७ ॥ द्विजो द्विजप्रियश्चैव द्विजराजेष्टदायकः । द्विजरूपो द्विजश्रेष्ठो दोषदो दुःसहोऽपि च ॥ ७८ ॥ देवादिदेवो देवेशो देवराजसुपूजितः । देवराजेष्टवरदो देवराजप्रियङ्करः ॥ ७९ ॥ देवादिवन्दितो दिव्यतनुर्देवशिखामणिः । देवगानप्रियश्चैव देवदेशिकपुङ्गवः ॥ ८० ॥ द्विजात्मजसमाराध्यो ध्येयो धर्मी धनुर्धरः । धनुष्मान् धनदाता च धर्माधर्मविवर्जितः ॥ ८१ ॥ धर्मरूपो धनुर्दिव्यो धर्मशास्त्रात्मचेतनः । धर्मराजप्रियकरो धर्मराजस्सुपूजितः ॥ ८२ ॥ धर्मराजेष्टवरदो धर्माभीष्टफलप्रदः । नित्यतृप्तस्वभावश्च नित्यकर्मरतस्तथा ॥ ८३ ॥ निजपीडार्तिहारी च निजभक्तेष्टदायकः । निर्मांसदेहो नीलश्च निजस्तोत्रबहुप्रियः ॥ ८४ ॥ नलस्तोत्रप्रियश्चैव नलराजसुपूजितः । नक्षत्रमण्डलगतो नमतां प्रियकारकः ॥ ८५ ॥ नित्यार्चितपदाम्भोजो निजाज्ञापरिपालकः । नवग्रहवरो नीलवपुर्नलकरार्चितः ॥ ८६ ॥ नलप्रियानन्दितश्च नलक्षेत्रनिवासकः । नलपाकप्रियश्चैव नलपद्भञ्जनक्षमः ॥ ८७ ॥ नलसर्वार्तिहारी च नलेनात्मार्थपूजितः । निपाटवीनिवासश्च नलाभीष्टवरप्रदः ॥ ८८ ॥ नलतीर्थसकृत् स्नानसर्वपीडानिवारकः । नलेशदर्शनस्याशु साम्राज्यपदवीप्रदः ॥ ८९ ॥ नक्षत्रराश्याधिपश्च नीलध्वजविराजितः । नित्ययोगरतश्चैव नवरत्नविभूषितः ॥ ९० ॥ नवधा भज्यदेहश्च नवीकृतजगत्त्रयः । नवग्रहाधिपश्चैव नवाक्षरजपप्रियः ॥ ९१ ॥ नवात्मा नवचक्रात्मा नवतत्त्वाधिपस्तथा । नवोदन प्रियश्चैव नवधान्यप्रियस्तथा ॥ ९२ ॥ निष्कण्टको निस्पृहश्च निरपेक्षो निरामयः । नागराजार्चितपदो नागराजप्रियङ्करः ॥ ९३ ॥ नागराजेष्टवरदो नागाभरणभूषितः । नागेन्द्रगाननिरतो नानाभरणभूषितः ॥ ९४ ॥ नवमित्रस्वरूपश्च नानाश्चर्यविधायकः । नानाद्वीपाधिकर्ता च नानालिपिसमावृतः ॥ ९५ ॥ नानारूपजगत्स्रष्टा नानारूपजनाश्रयः । नानालोकाधिपश्चैव नानाभाषाप्रियस्तथा ॥ ९६ ॥ नानारूपाधिकारी च नवरत्नप्रियस्तथा । नानाविचित्रवेषाढ्यो नानाचित्रविधायकः ॥ ९७ ॥ नीलजीमूतसङ्काशो नीलमेघसमप्रभः । नीलाञ्जनचयप्रख्यो नीलवस्त्रधरप्रियः ॥ ९८ ॥ नीचभाषाप्रचारज्ञो नीचेस्वल्पफलप्रदः । नानागमविधानज्ञो नानानृपसमावृतः ॥ ९९ ॥ नानावर्णाकृतिश्चैव नानावर्णस्वरार्तवः । नागलोकान्तवासी च नक्षत्रत्रयसम्युतः ॥ १०० ॥ नभादिलोकसम्भूतो नामस्तोत्रबहुप्रियः । नामपारायणप्रीतो नामार्चनवरप्रदः ॥ १०१ ॥ नामस्तोत्रैकचित्तश्च नानारोगार्तिभञ्जनः । नवग्रहसमाराध्यो नवग्रहभयापहः ॥ १०२ ॥ नवग्रहसुसम्पूज्यो नानावेदसुरक्षकः । नवग्रहाधिराजश्च नवग्रहजपप्रियः ॥ १०३ ॥ नवग्रहमयज्योतिर्नवग्रहवरप्रदः । नवग्रहाणामधिपो नवग्रहसुपीडितः ॥ १०४ ॥ नवग्रहाधीश्वरश्च नवमाणिक्यशोभितः । परमात्मा परब्रह्म परमैश्वर्यकारणः ॥ १०५ ॥ प्रपन्नभयहारी च प्रमत्तासुरशिक्षकः । प्रासहस्तः पङ्गुपादः प्रकाशात्मा प्रतापवान् ॥ १०६ ॥ पावनः परिशुद्धात्मा पुत्रपौत्रप्रवर्धनः । प्रसन्नात्सर्वसुखदः प्रसन्नेक्षण एव च ॥ १०७ ॥ प्रजापत्यः प्रियकरः प्रणतेप्सितराज्यदः । प्रजानां जीवहेतुश्च प्राणिनां परिपालकः ॥ १०८ ॥ प्राणरूपी प्राणधारी प्रजानां हितकारकः । प्राज्ञः प्रशान्तः प्रज्ञावान् प्रजारक्षणदीक्षितः ॥ १०९ ॥ प्रावृषेण्यः प्राणकारी प्रसन्नोत्सववन्दितः । प्रज्ञानिवासहेतुश्च पुरुषार्थैकसाधनः ॥ ११० ॥ प्रजाकरः प्रातिकूल्यः पिङ्गलाक्षः प्रसन्नधीः । प्रपञ्चात्मा प्रसविता पुराणपुरुषोत्तमः ॥ १११ ॥ पुराणपुरुषश्चैव पुरुहूतः प्रपञ्चधृत् । प्रतिष्ठितः प्रीतिकरः प्रियकारी प्रयोजनः ॥ ११२ ॥ प्रीतिमान् प्रवरस्तुत्यः पुरूरवसमर्चितः । प्रपञ्चकारी पुण्यश्च पुरुहूतसमर्चितः ॥ ११३ ॥ पाण्डवादिसुसंसेव्यः प्रणवः पुरुषार्थदः । पयोदसमवर्णश्च पाण्डुपुत्रार्तिभञ्जनः ॥ ११४ ॥ पाण्डुपुत्रेष्टदाता च पाण्डवानां हितङ्करः । पञ्चपाण्डवपुत्राणां सर्वाभीष्टफलप्रदः ॥ ११५ ॥ पञ्चपाण्डवपुत्राणां सर्वारिष्टनिवारकः । पाण्डुपुत्राद्यर्चितश्च पूर्वजश्च प्रपञ्चभृत् ॥ ११६ ॥ परचक्रप्रभेदी च पाण्डवेषुवनप्रदः । परब्रह्मस्वरूपश्च पराज्ञा परिवर्जितः ॥ ११७ ॥ परात्परः पाशहन्ता परमाणुः प्रपञ्चकृत् । पातङ्गी पुरुषाकारः परशम्भुसमुद्भवः ॥ ११८ ॥ प्रसन्नात्सर्वसुखदः प्रपञ्चोद्भवसम्भवः । प्रसन्नः परमोदारः पराहङ्कारभञ्जनः ॥ ११९ ॥ परः परमकारुण्यः परब्रह्ममयस्तथा । प्रपन्नभयहारी च प्रणतार्तिहरस्तथा ॥ १२० ॥ प्रसादकृत् प्रपञ्चश्च पराशक्तिसमुद्भवः । प्रदानपावनश्चैव प्रशान्तात्मा प्रभाकरः ॥ १२१ ॥ प्रपञ्चात्मा प्रपञ्चोपशमनः पृथिवीपतिः । परशुरामसमाराध्यः परशुरामवरप्रदः ॥ १२२ ॥ परशुरामचिरञ्जीविप्रदः परमपावनः । परमहंसस्वरूपश्च परमहंससुपूजितः ॥ १२३ ॥ पञ्चनक्षत्राधिपश्च पञ्चनक्षत्रसेवितः । प्रपञ्चरक्षितश्चैव प्रपञ्चस्य भयङ्करः ॥ १२४ ॥ फलदानप्रियश्चैव फलहस्तः फलप्रदः । फलाभिषेकप्रियश्च फल्गुनस्य वरप्रदः ॥ १२५ ॥ फुटच्छमित पापौघः फल्गुनेन प्रपूजितः । फणिराजप्रियश्चैव फुल्लाम्बुजविलोचनः ॥ १२६ ॥ बलिप्रियो बली बभ्रुर्ब्रह्मविष्ण्वीशक्लेशकृत् । ब्रह्मविष्ण्वीशरूपश्च ब्रह्मशक्रादिदुर्लभः ॥ १२७ ॥ बासदर्ष्ट्या प्रमेयाङ्गो बिभ्रत्कवचकुण्डलः । बहुश्रुतो बहुमतिर्ब्रह्मण्यो ब्राह्मणप्रियः ॥ १२८ ॥ बलप्रमथनो ब्रह्मा बहुरूपो बहुप्रदः । बालार्कद्युतिमान् बालो बृहद्वक्षो बृहत्तनुः ॥ १२९ ॥ ब्रह्माण्डभेदकृच्चैव भक्तसर्वार्थसाधकः । भव्यो भोक्ता भीतिकृच्च भक्तानुग्रहकारकः ॥ १३० ॥ भीषणो भैक्षकारी च भूसुरादिसुपूजितः । भोगभाग्यप्रदश्चैव भस्मीकृतजगत्त्रयः ॥ १३१ ॥ भयानको भानुसूनुर्भूतिभूषितविग्रहः । भास्वद्रतो भक्तिमतां सुलभो भ्रुकुटीमुखः ॥ १३२ ॥ भवभूतगणैस्स्तुत्यो भूतसङ्घसमावृतः । भ्राजिष्णुर्भगवान् भीमो भक्ताभीष्टवरप्रदः ॥ १३३ ॥ भवभक्तैकचित्तश्च भक्तिगीतस्तवोन्मुखः । भूतसन्तोषकारी च भक्तानां चित्तशोधकः ॥ १३४ ॥ भक्तिगम्यो भयहरो भावज्ञो भक्तसुप्रियः । भूतिदो भूतिकृद्भोज्यो भूतात्मा भुवनेश्वरः ॥ १३५ ॥ मन्दो मन्दगतिश्चैव मासमेव प्रपूजितः । मुचुकुन्दसमाराध्यो मुचुकुन्दवरप्रदः ॥ १३६ ॥ मुचुकुन्दार्चितपदो महारूपो महायशाः । महाभोगी महायोगी महाकायो महाप्रभुः ॥ १३७ ॥ महेशो महदैश्वर्यो मन्दारकुसुमप्रियः । महाक्रतुर्महामानी महाधीरो महाजयः ॥ १३८ ॥ महावीरो महाशान्तो मण्डलस्थो महाद्युतिः । महासुतो महोदारो महनीयो महोदयः ॥ १३९ ॥ मैथिलीवरदायी च मार्ताण्डस्य द्वितीयजः । मैथिलीप्रार्थनाक्लुप्तदशकण्ठशिरोपहृत् ॥ १४० ॥ मरामरहराराध्यो महेन्द्रादिसुरार्चितः । महारथो महावेगो मणिरत्नविभूषितः ॥ १४१ ॥ मेषनीचो महाघोरो महासौरिर्मनुप्रियः । महादीर्घो महाग्रासो महदैश्वर्यदायकः ॥ १४२ ॥ महाशुष्को महारौद्रो मुक्तिमार्गप्रदर्शकः । मकरकुम्भाधिपश्चैव मृकण्डुतनयार्चितः ॥ १४३ ॥ मन्त्राधिष्ठानरूपश्च मल्लिकाकुसुमप्रियः । महामन्त्रस्वरूपश्च महायन्त्रस्थितस्तथा ॥ १४४ ॥ महाप्रकाशदिव्यात्मा महादेवप्रियस्तथा । महाबलिसमाराध्यो महर्षिगणपूजितः ॥ १४५ ॥ मन्दचारी महामायी माषदानप्रियस्तथा । माषोदनप्रीतचित्तो महाशक्तिर्महागुणः ॥ १४६ ॥ यशस्करो योगदाता यज्ञाङ्गोऽपि युगन्धरः । योगी योग्यश्च याम्यश्च योगरूपी युगाधिपः ॥ १४७ ॥ यज्ञभृद्यजमानश्च योगो योगविदां वरः । यक्षराक्षसवेतालकूष्माण्डादिप्रपूजितः ॥ १४८ ॥ यमप्रत्यधिदेवश्च युगपद्भोगदायकः । योगप्रियो योगयुक्तो यज्ञरूपो युगान्तकृत् ॥ १४९ ॥ रघुवंशसमाराध्यो रौद्रो रौद्राकृतिस्तथा । रघुनन्दनसल्लापो रघुप्रोक्तजपप्रियः ॥ १५० ॥ रौद्ररूपी रथारूढो राघवेष्टवरप्रदः । रथी रौद्राधिकारी च राघवेण समर्चितः ॥ १५१ ॥ रोषात्सर्वस्वहारी च राघवेण सुपूजितः । राशिद्वयाधिपश्चैव रघुभिः परिपूजितः ॥ १५२ ॥ राज्यभूपाकरश्चैव राजराजेन्द्र वन्दितः । रत्नकेयूरभूषाढ्यो रमानन्दनवन्दितः ॥ १५३ ॥ रघुपौरुषसन्तुष्टो रघुस्तोत्रबहुप्रियः । रघुवंशनृपैः पूज्यो रणन्मञ्जीरनूपुरः ॥ १५४ ॥ रविनन्दन राजेन्द्रो रघुवंशप्रियस्तथा । लोहजप्रतिमादानप्रियो लावण्यविग्रहः ॥ १५५ ॥ लोकचूडामणिश्चैव लक्ष्मीवाणीस्तुतिप्रियः । लोकरक्षो लोकशिक्षो लोकलोचनरञ्जितः ॥ १५६ ॥ लोकाध्यक्षो लोकवन्द्यो लक्ष्मणाग्रजपूजितः । वेदवेद्यो वज्रदेहो वज्राङ्कुशधरस्तथा ॥ १५७ ॥ विश्ववन्द्यो विरूपाक्षो विमलाङ्गविराजितः । विश्वस्थो वायसारूढो विशेषसुखकारकः ॥ १५८ ॥ विश्वरूपी विश्वगोप्ता विभावसुसुतस्तथा । विप्रप्रियो विप्ररूपो विप्राराधनतत्परः ॥ १५९ ॥ विशालनेत्रो विशिखो विप्रदानबहुप्रियः । विश्वसृष्टिसमुद्भूतो वैश्वानरसमद्युतिः ॥ १६० ॥ विष्णुर्विरिञ्चिर्विश्वेशो विश्वकर्ता विशां पतिः । विराडाधारचक्रस्थो विश्वभुग्विश्वभावनः ॥ १६१ ॥ विश्वव्यापारहेतुश्च वक्रक्रूरविवर्जितः । विश्वोद्भवो विश्वकर्मा विश्वसृष्टि विनायकः ॥ १६२ ॥ विश्वमूलनिवासी च विश्वचित्रविधायकः । विश्वाधारविलासी च व्यासेन कृतपूजितः ॥ १६३ ॥ विभीषणेष्टवरदो वाञ्छितार्थप्रदायकः । विभीषणसमाराध्यो विशेषसुखदायकः ॥ १६४ ॥ विषमव्ययाष्टजन्मस्थोऽप्येकादशफलप्रदः । वासवात्मजसुप्रीतो वसुदो वासवार्चितः ॥ १६५ ॥ विश्वत्राणैकनिरतो वाङ्मनोतीतविग्रहः । विराण्मन्दिरमूलस्थो वलीमुखसुखप्रदः ॥ १६६ ॥ विपाशो विगतातङ्को विकल्पपरिवर्जितः । वरिष्ठो वरदो वन्द्यो विचित्राङ्गो विरोचनः ॥ १६७ ॥ शुष्कोदरः शुक्लवपुः शान्तरूपी शनैश्चरः । शूली शरण्यः शान्तश्च शिवायामप्रियङ्करः ॥ १६८ ॥ शिवभक्तिमतां श्रेष्ठः शूलपाणिः शुचिप्रियः । श्रुतिस्मृतिपुराणज्ञः श्रुतिजालप्रबोधकः ॥ १६९ ॥ श्रुतिपारगसम्पूज्यः श्रुतिश्रवणलोलुपः । श्रुत्यन्तर्गतमर्मज्ञः श्रुत्येष्टवरदायकः ॥ १७० ॥ श्रुतिरूपः श्रुतिप्रीतः श्रुतीप्सितफलप्रदः । शुचिश्रुतः शान्तमूर्तिः श्रुतिश्रवणकीर्तनः ॥ १७१ ॥ शमीमूलनिवासी च शमीकृतफलप्रदः । शमीकृतमहाघोरः शरणागतवत्सलः ॥ १७२ ॥ शमीतरुस्वरूपश्च शिवमन्त्रज्ञमुक्तिदः । शिवागमैकनिलयः शिवमन्त्रजपप्रियः ॥ १७३ ॥ शमीपत्रप्रियश्चैव शमीपर्णसमर्चितः । शतोपनिषदस्तुत्यः शान्त्यादिगुणभूषितः ॥ १७४ ॥ शान्त्यादिषड्गुणोपेतः शङ्खवाद्यप्रियस्तथा । श्यामरक्तसितज्योतिः शुद्धपञ्चाक्षरप्रियः ॥ १७५ ॥ श्रीहालास्यक्षेत्रवासी श्रीमान् शक्तिधरस्तथा । षोडशद्वयसम्पूर्णलक्षणः षण्मुखप्रियः ॥ १७६ ॥ षड्गुणैश्वर्यसम्युक्तः षडङ्गावरणोज्ज्वलः । षडक्षरस्वरूपश्च षट्चक्रोपरिसंस्थितः ॥ १७७ ॥ षोडशी षोडशान्तश्च षट्छक्तिव्यक्तमूर्तिमान् । षड्भावरहितश्चैव षडङ्गश्रुतिपारगः ॥ १७८ ॥ षट्कोणमध्यनिलयः षट्छास्त्रस्मृतिपारगः । स्वर्णेन्द्रनीलमकुटः सर्वाभीष्टप्रदायकः ॥ १७९ ॥ सर्वात्मा सर्वदोषघ्नः सर्वगर्वप्रभञ्जनः । समस्तलोकाभयदः सर्वदोषाङ्गनाशकः ॥ १८० ॥ समस्तभक्तसुखदः सर्वदोषनिवर्तकः । सर्वनाशक्षमः सौम्यः सर्वक्लेशनिवारकः ॥ १८१ ॥ सर्वात्मा सर्वदा तुष्टः सर्वपीडानिवारकः । सर्वरूपी सर्वकर्मा सर्वज्ञः सर्वकारकः ॥ १८२ ॥ सुकृती सुलभश्चैव सर्वाभीष्टफलप्रदः । सूर्यात्मजः सदातुष्टः सूर्यवंशप्रदीपनः ॥ १८३ ॥ सप्तद्वीपाधिपश्चैव सुरासुरभयङ्करः । सर्वसङ्क्षोभहारी च सर्वलोकहितङ्करः ॥ १८४ ॥ सर्वौदार्यस्वभावश्च सन्तोषात्सकलेष्टदः । समस्तऋषिभिः स्तुत्यः समस्तगणपावृतः ॥ १८५ ॥ समस्तगणसंसेव्यः सर्वारिष्टविनाशनः । सर्वसौख्यप्रदाता च सर्वव्याकुलनाशनः ॥ १८६ ॥ सर्वसङ्क्षोभहारी च सर्वारिष्टफलप्रदः । सर्वव्याधिप्रशमनः सर्वमृत्युनिवारकः ॥ १८७ ॥ सर्वानुकूलकारी च सौन्दर्यमृदुभाषितः । सौराष्ट्रदेशोद्भवश्च स्वक्षेत्रेष्टवरप्रदः ॥ १८८ ॥ सोमयाजिसमाराध्यः सीताभीष्टवरप्रदः । सुखासनोपविष्टश्च सद्यःपीडानिवारकः ॥ १८९ ॥ सौदामनीसन्निभश्च सर्वानुल्लङ्घ्यशासनः । सूर्यमण्डलसञ्चारी संहारास्त्रनियोजितः ॥ १९० ॥ सर्वलोकक्षयकरः सर्वारिष्टविधायकः । सर्वव्याकुलकारी च सहस्रजपसुप्रियः ॥ १९१ ॥ सुखासनोपविष्टश्च संहारास्त्रप्रदर्शितः । सर्वालङ्कारसम्युक्तकृष्णगोदानसुप्रियः ॥ १९२ ॥ सुप्रसन्नः सुरश्रेष्ठः सुघोषः सुखदः सुहृत् । सिद्धार्थः सिद्धसङ्कल्पः सर्वज्ञः सर्वदः सुखी ॥ १९३ ॥ सुग्रीवः सुधृतिः सारः सुकुमारः सुलोचनः । सुव्यक्तः सच्चिदानन्दः सुवीरः सुजनाश्रयः ॥ १९४ ॥ हरिश्चन्द्रसमाराध्यो हेयोपादेयवर्जितः । हरिश्चन्द्रेष्टवरदो हंसमन्त्रादिसंस्तुतः ॥ १९५ ॥ हंसवाहसमाराध्यो हंसवाहवरप्रदः । हृद्यो हृष्टो हरिसखो हंसो हंसगतिर्हविः ॥ १९६ ॥ हिरण्यवर्णो हितकृद्धर्षदो हेमभूषणः । हविर्होता हंसगतिर्हंसमन्त्रादिसंस्तुतः ॥ १९७ ॥ हनूमदर्चितपदो हलधृत् पूजितः सदा । क्षेमदः क्षेमकृत् क्षेम्यः क्षेत्रज्ञः क्षामवर्जितः ॥ १९८ ॥ क्षुद्रघ्नः क्षान्तिदः क्षेमः क्षितिभूषः क्षमाश्रयः । क्षमाधरः क्षयद्वारो नाम्नामष्टसहस्रकम् ॥ १९९ ॥ ॥ फलश्रुति ॥ वाक्येनैकेन वक्ष्यामि वाञ्चितार्थं प्रयच्छति । तस्मात्सर्वप्रयत्नेन नियमेन जपेत्सुधीः ॥ २०० ॥ ॥ इति श्री शनैश्चर सहस्रनाम स्तोत्रम् सम्पूर्णम् ॥