Sri Kalika Argala Stotram – श्री कालिका अर्गल स्तोत्रम्

॥ श्री गणेशाय नमः ॥ ॥ श्री कालिका अर्गल स्तोत्रम् ॥ ॥ विनियोग ॥ अस्य श्री कालिकार्गल स्तोत्रस्य भैरव ऋषिः अनुष्टुप् छन्दः श्रीकालिका देवता मम सर्वसिद्धिसाधने विनियोगः । ॥ अंग न्यास - शीर्ष ॥ ओं नमस्ते कालिके देवि आद्यबीजत्रय प्रिये । वशमानय मे नित्यं सर्वेषां प्राणिनां सदा ॥ १ ॥ कूर्चयुग्मं ललाटे च स्थातु मे शववाहिनी । सर्वसौभाग्यसिद्धिं च देहि दक्षिण कालिके ॥ २ ॥ भुवनेश्वरि बीजयुग्मं भ्रूयुगे मुण्डमालिनी । कन्दर्परूपं मे देहि महाकालस्य गेहिनि ॥ ३ ॥ दक्षिणे कालिके नित्ये पितृकाननवासिनि । नेत्रयुग्मं च मे देहि ज्योतिरालेपनं महत् ॥ ४ ॥ श्रवणे च पुनर्लज्जाबीजयुग्मं मनोहरम् । महाश्रुतिधरत्वं च मे देहि मुक्त कुन्तले ॥ ५ ॥ ह्रीं ह्रीं बीजद्वयं देवि पातु नासापुटे मम । देहि नानाविधिं मह्यं सुगन्धिं त्वं दिगम्बरे ॥ ६ ॥ ॥ अंग न्यास - मुख ॥ पुनस्त्रिबीजप्रथमं दन्तोष्ठरसनादिकम् । गद्यपद्यमयीं वाणीं काव्यशास्त्राद्यलङ्कृताम् ॥ ७ ॥ अष्टादशपुराणानां स्मृतीनां घोरचण्डिके । कविता सिद्धिलहरीं मम जिह्वां निवेशय ॥ ८ ॥ वह्निजाया महादेवि घण्टिकायां स्थिरा भव । देहि मे परमेशानि बुद्धिसिद्धिरसायकम् ॥ ९ ॥ ॥ अंग न्यास - हृदय ॥ तुर्याक्षरी चित्स्वरूपा कालिका मन्त्रसिद्धिदा । सा च तिष्ठतु हृत्पद्मे हृदयानन्दरूपिणी ॥ १० ॥ षडक्षरी महाकाली चण्डकाली शुचिस्मिता । रक्तासिनी घोरदंष्ट्रा भुजयुग्मे सदाऽवतु ॥ ११ ॥ सप्ताक्षरी महाकाली महाकालरतोद्यता । स्तनयुग्मे सूर्यकर्णो नरमुण्डसुकुन्तला ॥ १२ ॥ ॥ अंग न्यास - मध्य ॥ तिष्ठ स्वजठरे देवि अष्टाक्षरी शुभप्रदा । पुत्रपौत्रकलत्रादि सुहृन्मित्राणि देहि मे ॥ १३ ॥ दशाक्षरी महाकाली महाकालप्रिया सदा । नाभौ तिष्ठतु कल्याणी श्मशानालयवासिनी ॥ १४ ॥ चतुर्दशार्णवा या च जयकाली सुलोचना । लिङ्गमध्ये च तिष्ठस्व रेतस्विनी ममाङ्गके ॥ १५ ॥ ॥ अंग न्यास - अधः ॥ गुह्यमध्ये गुह्यकाली मम तिष्ठ कुलाङ्गने । सर्वाङ्गे भद्रकाली च तिष्ठ मे परमात्मिके ॥ १६ ॥ कालि पादयुगे तिष्ठ मम सर्वमुखे शिवे । कपालिनी च या शक्तिः खड्गमुण्डधरा शिवा ॥ १७ ॥ पादद्वयाङ्गुलिष्वङ्गे तिष्ठ स्वपापनाशिनि । कुल्लादेवी मुक्तकेशी रोमकूपेषु वै मम ॥ १८ ॥ ॥ विविध शक्तियाँ ॥ तिष्ठतु उत्तमाङ्गे च कुरुकुल्ला महेश्वरी । विरोधिनी विरोधे च मम तिष्ठतु शङ्करी ॥ १९ ॥ विप्रचित्ते महेशानि मुण्डधारिणि तिष्ठ माम् । मार्गे दुर्मार्गगमने उग्रा तिष्ठतु सर्वदा ॥ २० ॥ प्रभादिक्षु विदिक्षु माम् दीप्तां दीप्तं करोतु माम् । नीलाशक्तिश्च पाताले घना चाकाशमण्डले ॥ २१ ॥ पातु शक्तिर्बलाका मे भुवं मे भुवनेश्वरी । मात्रा मम कुले पातु मुद्रा तिष्ठतु मन्दिरे ॥ २२ ॥ मिता मे योगिनी या च तथा मित्रकुलप्रदा । सा मे तिष्ठतु देवेशि पृथिव्यां दैत्यदारिणी ॥ २३ ॥ ॥ अष्ट मातृकाएं ॥ ब्राह्मी ब्रह्मकुले तिष्ठ मम सर्वार्थदायिनी । नारायणी विष्णुमाया मोक्षद्वारे च तिष्ठ मे ॥ २४ ॥ माहेश्वरी वृषारूढा काशिकापुरवासिनी । शिवतां देहि चामुण्डे पुत्रपौत्रादि चानघे ॥ २५ ॥ कौमारी च कुमाराणां रक्षार्थं तिष्ठ मे सदा । अपराजिता विश्वरूपा जये तिष्ठ स्वभाविनी ॥ २६ ॥ वाराही वेदरूपा च सामवेदपरायणा । नारसिंही नृसिंहस्य वक्षःस्थलनिवासिनी ॥ २७ ॥ सा मे तिष्ठतु देवेशि पृथिव्यां दैत्यदारिणी । सर्वेषां स्थावरादीनां जङ्गमानां सुरेश्वरी ॥ २८ ॥ ॥ फलश्रुति ॥ स्वेदजोद्भिजाण्डजानां चराणां च भयादिकम् । विनाश्याप्यभिमतिं च देहि दक्षिण कालिके ॥ २९ ॥ य इदं चार्गलं देवि यः पठेत्कालिकार्चने । सर्वसिद्धिमवाप्नोति खेचरो जायते तु सः ॥ ३० ॥ ॥ इति श्री कालिका अर्गल स्तोत्रं सम्पूर्णम् ॥