श्री ऋणहर्तृ गणेश स्तोत्रम् (Runa Hartru Ganesha Stotram)

॥ श्री ऋणहर्तृ गणेश स्तोत्रम् ॥ ॥ अथ प्रयोगः ॥ अस्य श्री ऋणहर्तृगणपतिस्तोत्र महामन्त्रस्य । सदाशिव ऋषिः । अनुष्टुप् छन्दः । श्रीऋणहर्तृगणपतिर्देवता । ग्लौं बीजम् । गः शक्तिः । गं कीलकम् । मम सकल ऋणनाशने जपे विनियोगः । करन्यासः । ओं गणेश अङ्गुष्ठाभ्यां नमः । ओं ऋणं छिन्दि तर्जनीभ्यां नमः । ओं वरेण्यं मध्यमाभ्यां नमः । ओं हुं अनामिकाभ्यां नमः । ओं नमः कनिष्टिकाभ्यां नमः । ओं फट् करतलकरपृष्ठाभ्यां नमः । षडङ्गन्यासः । ओं गणेश हृदयाय नमः । ओं ऋणं छिन्दि शिरसे स्वाहा । ओं वरेण्यं शिखायै वषट् । ओं हुं कवचाय हुम् । ओं नमः नेत्रत्रयाय वौषट् । ओं फट् अस्त्राय फट् । ध्यानम् - सिन्दूरवर्णं द्विभुजं गणेशं लम्बोदरं पद्मदले निविष्टम् । ब्रह्मादिदेवैः परिसेव्यमानं सिद्ध्यैर्युतं तं प्रणमामि देवम् ॥ सृष्ट्यादौ ब्रह्मणा सम्यक्पूजितः फलसिद्धये । सदैव पार्वतीपुत्रः ऋणनाशं करोतु मे ॥ १ ॥ त्रिपुरस्य वधात्पूर्वं शम्भुना सम्यगर्चितः । सदैव पार्वतीपुत्रः ऋणनाशं करोतु मे ॥ २ ॥ हिरण्यकशिप्वादीनां वधार्थे विष्णुनार्चितः । सदैव पार्वतीपुत्रः ऋणनाशं करोतु मे ॥ ३ ॥ महिषस्य वधे देव्या गणनाथः प्रपूजितः । सदैव पार्वतीपुत्रः ऋणनाशं करोतु मे ॥ ४ ॥ तारकस्य वधात्पूर्वं कुमारेण प्रपूजितः । सदैव पार्वतीपुत्रः ऋणनाशं करोतु मे ॥ ५ ॥ भास्करेण गणेशो हि पूजितश्छविसिद्धये । सदैव पार्वतीपुत्रः ऋणनाशं करोतु मे ॥ ६ ॥ शशिना कान्तिवृद्ध्यर्थं पूजितो गणनायकः । सदैव पार्वतीपुत्रः ऋणनाशं करोतु मे ॥ ७ ॥ पालनाय स्वतपसां विश्वामित्रेण पूजितः । सदैव पार्वतीपुत्रः ऋणनाशं करोतु मे ॥ ८ ॥ इदं ऋणहरस्तोत्रं तीव्रदारिद्र्यनाशनम् । एकवारं पठेन्नित्यं वर्षमेकं समाहितः ॥ ९ ॥ दारिद्र्याद्दारुणान्मुक्तः कुबेरसम्पदं व्रजेत् । फडन्तोऽयं महामन्त्रः सार्थपञ्चदशाक्षरः ॥ १० ॥ ओं गणेश ऋणं छिन्दि वरेण्यं हुं नमः फट् । इमं मन्त्रं पठेदन्ते ततश्च शुचिभावनः ॥ ११ ॥ एकविंशतिसङ्ख्याभिः पुरश्चरणमीरितम् । सहस्रावर्तनात्सम्यक् षण्मासं प्रियतां व्रजेत् ॥ १२ ॥ बृहस्पतिसमो ज्ञाने धने धनपतिर्भवेत् । अस्यैवायुतसङ्ख्याभिः पुरश्चरणमीरितम् ॥ १३ ॥ लक्षमावर्तनात्सम्यग्वाञ्छितं फलमाप्नुयात् । भूतप्रेतपिशाचानां नाशनं स्मृतिमात्रतः ॥ १४ ॥ इति श्रीकृष्णयामलतन्त्रे उमामहेश्वरसंवादे ऋणहर्तृ गणेश स्तोत्रम् ।