वेदोक्त सबीज नवग्रह मन्त्र जप प्रयोग

॥ श्रीगणेशाय नमः ॥ ॥ अथ वेदोक्तसबीजनवग्रहमन्त्रजपप्रयोगः ॥ १. सूर्यः (Sun) अथ आदित्यमन्त्रः - विनियोगः ॐ आकृष्णेति मन्त्रस्य हिरण्यस्तूपाङ्गिरस ऋषिस्त्रिष्टुप्छन्दः सूर्यो देवता सूर्यप्रीत्यर्थे जपे विनियोगः ॥ अथ देहाङ्गन्यासः आकृष्णेन शिरसि । रजसा ललाटे । वर्तमानो मुखे । निवेशयन् हृदये । अमृतं नाभौ । मर्त्यं च कट्याम् । हिरण्ययेन सविता ऊर्व्वोः । रथेना जान्वोः । देवो याति जङ्घयोः । भुवनानि पश्यन् पादयोः ॥ अथ करन्यासः एवं हृदयादिन्यासः आकृष्णेन रजसा अङ्गुष्ठाभ्यां नमः / हृदयाय नमः । वर्तमानो निवेशयन् तर्जनीभ्यां नमः / शिरसे स्वाहा । अमृतं मर्त्यं च मध्यमाभ्यां नमः / शिखायै वषट् । हिरण्ययेन अनामिकाभ्यां नमः / कवचाय हुँ । सविता रथेना कनिष्ठिकाभ्यां नमः / नेत्रत्रयाय वौषट् । देवो याति भुवनानि पश्यन् करतलकरपृष्ठाभ्यां नमः / अस्त्राय फट् । अथ ध्यानं एवं सूर्यगायत्री पद्मासनः पद्मकरो द्विबाहुः पद्मद्युतिः सप्ततुरङ्गवाहनः । दिवाकरो लोकगुरुः किरीटी मयि प्रसादं विदधातु देवः ॥ ॐ आदित्याय विद्महे दिवाकराय धीमहि तन्नः सूर्यः प्रचोदयात् ॥ १॥ ॥ सबीज जपमन्त्रः ॥ ॐ ह्राँ ह्रीं ह्रौं सः ॐ भूर्भुवः स्वः - ॐ आकृष्णेन रजसा वर्तमानो निवेशयन्नमृतम्मर्त्यञ्च । हिरण्ययेन सविता रथेना देवो याति भुवनानि पश्यन् ॥ ॐ स्वः भुवः भूः ॐ सः ह्रौं ह्रीं ह्राँ ॐ सूर्याय नमः ॥ १॥ अनुष्ठान एवं दान जपसङ्ख्या ७०००। जपान्ते अर्कसमित्-तिल-पायस-घृतैर्द्दशांशहोमः। दान: माणिक्यगोधूमसवत्सधेनुः कौसुम्भवासो गुडहेम ताम्रम् । आरक्तकं चन्दनमम्बुजञ्च वदन्ति दानं हि प्रदीप्तधाम्ने ॥ २. चन्द्रः (Moon) विनियोगः इमन्देवेतिमन्त्रस्य गौतम ऋषिः, सोमो देवता, विराट् छन्दः, सोमप्रीत्यर्थे जपे विनियोगः । देहाङ्गन्यासः इमं देवा शिरसि । असपत्नꣳ ललाटे । सुवध्वं नासिकायाम् । महते क्षत्राय मुखे । महते ज्येष्ट्याय हृदये । महते जानराज्याय उदरे । इन्द्रस्येन्द्रियाय नाभौ । इमममुष्य कट्याम् । पुत्रममुष्यै मेढ्रे । पुत्रमस्यै ऊर्वोः । विशऽएष वो जान्वोः । मीराजा जङ्घयोः । सोमोऽस्माकं गुल्फयोः । ब्राह्मणानाꣳ राजा पादयोः । अथ ध्यानं एवं चन्द्रगायत्री श्वेताम्बरः श्वेतविभूषणश्च श्वेतद्युतिर्दण्डधरो द्विबाहुः । चन्द्रोऽमृतात्मा वरदः किरीटी मयि प्रसादं विदधातु देवः ॥ ॐ अत्रिपुत्राय विद्महे सागरोद्भवाय धीमहि तन्नश्चन्द्रः प्रचोदयात् ॥ ॥ सबीज जपमन्त्रः ॥ ॐ श्राँ श्रीं श्रौं सः ॐ भूर्भुवः स्वः - ॐ इमन्देवाऽअसपत्नꣳ सुवध्वम्महते क्षत्राय महते ज्येष्ठ्याय महते जानराज्ज्यायेन्द्रस्येन्द्रियाय । इमममुष्य पुत्रममुष्यै पुत्रमस्यै विशऽएष वोऽमीराजा सोमोस्माकम्ब्राह्मणानाꣳ राजा ॥ ॐ स्वः भुवः भूः ॐ सः श्रौं श्रीं श्राँ ॐ सोमाय नमः ॥ अनुष्ठान एवं दान जपसङ्ख्या ११०००। पलाशसमित् दशांशहोमः। दान: सद्वंशपात्रस्थिततन्दुलाश्च कर्पूरमुक्ताफलशुभ्रवस्त्रम् । युगोपयुक्तं वृषभश्च रौप्यं चन्द्राय दद्याद् घृतपूर्णकुम्भम् ॥ ३. भौमः (Mars) विनियोगः अग्निर्मूद्धेति मन्त्रस्य विरूपाङ्गिरस ऋषिः, अग्निर्देवता, गायत्री छन्दः, भौमप्रीत्यर्थे जपे विनियोगः। देहाङ्गन्यासः अग्निः शिरसि । मूर्द्धा ललाटे । दिवः मुखे । ककुत् हृदये । पतिः उदरे । पृथिव्या नाभौ । अयं कट्याम् । अपाꣳ जान्वोः । रेताꣳ सि गुल्फयोः । जिन्वति पादयोः । अथ ध्यानं एवं भौमगायत्री रक्ताम्बरो रक्तवपुः किरीटी चतुर्भुजो मेषगतो गदाभृत् । धरासुतः शक्तिधरश्च शूली सदायमस्मद्वरदः प्रसन्नः ॥ ॐ क्षितिपुत्राय विद्महे लोहिताङ्गाय धीमहि तन्नो भौमः प्रचोदयात् ॥ ॥ सबीज जपमन्त्रः ॥ ॐ क्राँ क्रीं क्रौं सः भूर्भुवः स्वः - ॐ अग्निर्म्मूर्द्धा दिवः ककुत्पतिः पृथिव्याऽअयम् । अपाꣳ रेताꣳ सि जिन्न्वति ॥ ॐ स्वः भवः भूः ॐ सः क्रौं क्रीं क्राँ ॐ भौमाय नमः ॥ अनुष्ठान एवं दान जपसङ्ख्या १००००। खदिरसमित् दशांशहोमः। दान: प्रवालगोधूममसूरिकाश्च वृषोऽरुणश्चापि गुडः सुवर्णम् । आरक्तवस्त्रं करवीरपुष्पं ताम्रं च भौमाय वदन्ति दानम् ॥ ४. बुधः (Mercury) विनियोगः उद्बुध्यस्वेति मन्त्रस्य परमेष्ठी प्रजापति ऋषिः त्रिष्टुप्छन्दः, बुधो देवता, बुधप्रीत्यर्थे जपे विनियोगः । देहाङ्गन्यासः उद्बुध्यस्वेति शिरसि । अग्ने प्रति ललाटे । जागृहि त्वं मुखे । इष्टापूर्ते हृदये । सꣳ सृजेथामयञ्च नाभौ । अस्मिन्त्सधस्थे कट्याम् । अद्ध्युत्तरस्मिन् ऊर्वोः । विश्वे देवा जान्वोः । यजमानश्च गल्फयोः । सीदत पादयोः ॥ अथ ध्यानं एवं बुधगायत्री पीताम्बरः पीतवपुः किरीटी चतुर्भुजो दण्डधरश्च हारी । चर्मासिधृक् सोमसुतो गदाभृत् सिंहाधिरूढो वरदो बुधश्च ॥ ॐ चन्द्रपुत्राय विद्महे रोहिणीप्रियाय धीमहि तन्नो बुधः प्रचोदयात् ॥ ॥ सबीज जपमन्त्रः ॥ ॐ ब्राँ ब्रीं ब्रौं सः भूर्भुवः स्वः - ॐ उद्बुध्यस्वाग्ने प्रतिजागृहि त्वमिष्टापूर्ते सꣳ सृजेथामयञ्च अस्मिन्त्सधस्थेऽअध्युत्तरस्मिन्न्विश्वे देवा यजमानश्च सीदत ॥ ॐ स्वः भुवः भूः ॐ सः ब्रौं ब्रीं ब्राँ ॐ सौम्याय नमः ॥ अनुष्ठान एवं दान जपसङ्ख्या ४०००। अपामार्गसमित् दशांशहोमः। दान: चैलं च नीलं कलधौतकांस्यं मुद्राज्यगारुत्मतसर्वपुष्यम् । दासी च दन्तो द्विरदस्य नूनं वदन्ति दानं बिधुनन्दनाय ॥ ५. बृहस्पतिः (Jupiter) विनियोगः बृहस्पतेति मन्त्रस्य गृत्समद ऋषिः, अनुष्टुप्छन्दः, ब्रह्मा देवता, बृहस्पतिप्रीत्यर्थे जपे विनियोगाः देहाङ्गन्यासः बृहस्पते शिरसि । अतियदर्य्यो ललाटे । अर्हाद्युमत् मुखे । विभाति क्रतुमत् हृदये । जनेषु नाभौ । यद्दीदयत् कट्याम् । शवसऋतप्रजात ऊर्वोः । तदस्मासु द्रविणं जान्वोः । धेहि गुल्फयोः । चित्रं पादयोः । अथ ध्यानं एवं गुरुगायत्री पीताम्बरः पीतवपुः किरीटी चतुर्भुजो देवगुरुः प्रशान्तः । तथाऽक्षसूत्रं च कमण्डलुञ्च दण्डञ्च बिभ्रद्वरदोऽस्तु मह्यम् ॥ ॐ अङ्गिरोजाताय विद्महे वाचस्पतये धीमहि तन्नो गुरुः प्रचोदयात् ॥ ॥ सबीज जपमन्त्रः ॥ ॐ ह्राँ ह्रीं ह्रौं सः भूर्भुवः स्वः - ॐ बृहस्पतेऽअतियदर्य्योऽअर्हाद्युमद्विभाति क्रतुमज्जनेषु यद्दीदयच्छवसऽऋत प्रजात तदस्मासु द्रविणन्धेहि चित्रम् ॥ ॐ स्वः भवः भूः ॐ सः ह्रौं ह्रीं ह्राँ ॐ बृहस्पतये नमः ॥ अनुष्ठान एवं दान जपसङ्ख्या १९०००। अश्वत्थसमित् दशांशहोमः। दान: शर्करा च रजनीतुरङ्गमः पीतधान्यमपि पीतमम्बरम् । पुष्पराजलवणे च काञ्चनं प्रीतये सुरगुरोः प्रदीयताम् ॥ ६. शुक्रः (Venus) विनियोगः अन्नात्परिस्रुतेति मन्त्रस्य प्रजापतिऋषिः, अनुष्टुप् छन्दः, शुक्रो देवता, शुक्रप्रीत्यर्थे जपे विनियोगः। देहाङ्गन्यासः अन्नात्परिस्रुतः शिरसि । रसं ब्रह्मणा ललाटे । व्यपिबत्क्षत्रं मुखे । पयः सोमं हृदये । प्रजापतिः नाभौ । ऋतेन सत्यं कट्याम् । इन्द्रियं विपानꣳ गुदे । शुक्रं वृषणे । अन्धस ऊर्वोः इन्द्रस्येन्द्रियं जानुनोः । इदं पयः गुल्फयोः । अमृतं मधु पादयोः। अथ ध्यानं एवं भृगुगायत्री श्वेताम्बरः श्वेतवपुः किरीटी चतुर्भुजो दैत्यगरुः प्रशान्तः । तथाऽक्षसूत्रञ्च कमण्डलुञ्च दण्डञ्च बिभ्रद्वरदोऽस्तु मह्यम् ॥ ॐ भृगुवंशजाताय विद्महे श्वेतवाहनाय धीमहि तन्नः कविः प्रचोदयात् ॥ ॥ सबीज जपमन्त्रः ॥ ॐ द्राँ द्रीं द्रौं सः भूर्भुवः स्वः - ॐ अन्नात् परिस्रुतो रसम्ब्रह्मणा व्यपिबत्क्षत्रम्पयः सोमं प्रजापतिः । ऋतेन सत्यमिन्द्रियं विपानर्ठं शुक्रमन्धसऽइन्द्रस्येन्द्रियमिदम्पयो मृतम्मधु ॥ ॐ स्वः भुवः भूः ॐ सः द्रौं द्रीं द्राँ ॐ शुक्राय नमः ॥ अनुष्ठान एवं दान जपसङ्ख्या १६०००। औदुम्बरसमित् दशांशहोमः। दान: चित्राम्बरं शुभ्रतुरङ्गमश्च धेनुश्च वज्रं रजतं सुवर्णम् । सुतण्डुलानुत्तमगन्धयुक्तान् वदन्ति दानं भृगुनन्दनाय ॥ ७. शनिः (Saturn) विनियोगः शन्नो देवीति मन्त्रस्य सिन्धुद्वीप ऋषिः, गायत्रीछन्दः आपो देवता, शनिप्रीत्यर्थे जपे विनियोगः । देहाङ्गन्यासः शन्नो शिरसि । देवीः ललाटे । अभिष्टय मुखे । आपो कण्ठे । भवन्तु हृदये । पीतये नाभौ । शं कट्याम् । योः ऊर्वोः । अभि जान्वोः । स्रवन्तु गुल्फयीः । नः पादयोः । अथ ध्यानं एवं शनिगायत्री नीलाम्बरः शूलधरः किरीटी गृघ्रस्थितस्त्रासकरो धनुष्मान् । चतुर्भुजः सूर्यसुतः प्रशान्तः सदाऽस्तु मह्यं वरदोऽल्पगामी ॥ ॐ कृण्णाङ्गाय विद्महे रविपुत्राय धीमहि तन्नः सौरिः प्रचोदयात् ॥ ॥ सबीज जपमन्त्रः ॥ खाँ खीं खौं सः ॐ भूर्भुवः स्वः - ॐ शन्नो देवीरभिष्टयऽआपो भवन्तु पीतये शंय्योरभिस्रवन्तु नः ॥ ॐ स्वः भुवः भूः ॐ सः खौं खीं खाँ ॐ शनैश्चराय नमः ॥ अनुष्ठान एवं दान जपसङ्ख्या २३०००। शमीसमित् दशांशहोमः। दान: माषांश्च तैलं विमलेन्द्रनीलं तिलाः कुलित्था महिषी च लोहम् । कृष्णा च धेनुः प्रवदन्ति नूनं दुष्टाय दानं रविनन्दनाय ॥ ८. राहुः (Rahu) विनियोगः कया नश्चित्रेति मन्त्रस्य वामदेव ऋषिः, गायत्री छन्दः, राहुर्देवताः, राहुप्रीत्यर्थे जपे विनियोगः ॥ देहाङ्गन्यासः कया शिरसि । न ललाटे । चित्र मुखे । आ कण्ठे । भुव हृदये । दूती नाभौ । सदा कट्याम् । वृधः मेढ्रे । सखा ऊर्व्वो । कया जान्वोः । शचिष्ठया गुल्फयोः । वृता पादयोः ॥ अथ ध्यानं एवं राहुगायत्री नीलाम्बरो नीलवपुः किरीटी करालवक्त्रः करवाल शूली । चतुर्भुजश्चक्रधरश्च राहुः सिंहाधिरूढो वरदोऽस्तु मह्यम् ॥ नीलवर्णाय विद्महे सैहिकेयाय धीमहि तन्नो राहुः प्रचोदयात् ॥ ॥ सबीज जपमन्त्रः ॥ ॐ भ्राँ भ्रीं भ्रौं सः ॐ भूर्भुवः स्वः - ॐ कया नश्चित्रऽआभुवदूती सदावृधः सखा । कया शचिष्ठया व्वृता ॥ ॐ स्वः भुवः भूः ॐ सः भ्रौं भ्रीं भ्राँ ॐ राहवे नमः ॥ अनुष्ठान एवं दान जपसङ्ख्या १८०००। दुर्वासमित् दशांशहोमः। दान: गोमेदरत्नं च तुरङ्गमश्च सुनीलचैलामलकम्बलञ्च । तिलाश्च तैलं खलु लोहमिश्रं स्वर्भानवे दानमिदं प्रदेयम् ॥ ९. केतुः (Ketu) विनियोगः केतुं कृण्वन्निति मन्त्रस्य मधुच्छन्द ऋषिः, गायत्रीच्छन्दः, केतुर्देवता, केतुप्रीत्यर्थे जपे विनियोगः । देहाङ्गन्यासः केतुं शिरसि । कृण्वन् ललाटे । अकेतवे मुखे । पेशो हृदये । मर्या नाभौ । अपेशसे कट्याम् । सं ऊर्व्वो । उषद्भिः जान्वोः । अजायथाः पादयोः । अथ ध्यानं एवं केतुगायत्री धूम्रो द्विबाहुर्वरदो गदाधरो गृध्रासनस्थो विकृताननश्च । किरीटकेयूरविभूषितो यः सदाऽस्तु मे केतुगणः प्रशान्तः ॥ ॐ धूम्राय विद्महे कपोतवाहनाय धीमहि तन्नः केतुः प्रचोदयात् ॥ ॥ सबीज जपमन्त्रः ॥ ॐ प्राँ प्रीं प्रौं सः ॐ भूर्भुवः स्वः - ॐ केतुङ् कृण्वन्नकेतवे पेशो मर्य्याऽअपेशसे । समुषद्भिरजायथाः ॥ ॐ स्वः, भुवः, भूः, ॐ सः प्रौं प्रीं प्राँ ॐ केतवे नमः ॥ अनुष्ठान एवं दान जपसङ्ख्या १७०००। कुशसमित् दशांशहोमः। दान: वैडूर्यरत्नं सतिलं च तैलं सुकम्बलं चापि मदो मृगस्य । शस्त्रं च केतोः परितोषहेतोश्छागस्य दानं कथितं मुनीन्द्रैः ॥ ॥ इति वेदोक्तसबीजनवग्रहमन्त्रजपप्रयोगः सम्पूर्णः ॥