Sri Turiya Shodashi Trailokya Vijaya Kavacham – श्री तुरीया षोडशी त्रैलोक्य विजय कवचम्

॥ श्रीमहात्रिपुरसुन्दर्यै नमः ॥ ॥ पूर्वपीठिका ॥ कैलासशिखरे रम्ये देवदेवं जगद्गुरुम् । शङ्करं परिपप्रच्छ कुमारः शिखिवाहनः ॥ १॥ ॥ श्रीस्कन्द उवाच ॥ जनक श्रीगुरो देव पुत्रवात्सल्यवर्धन! । कवचं षोडशाक्षर्या वद मे परमेश्वर!॥ २॥ ॥ श्रीईश्वर उवच ॥ श‍ृणु पुत्र महाभाग! कवचं मन्त्रविग्रहम् । गोप्याद्गोप्यतरं गोप्यं गुह्याद्गुह्यतरं महत् ॥ ३॥ तव स्नेहात् प्रवक्ष्यामि नाख्यातं यस्य कस्यचित् । ब्रह्मेशविष्णुशक्रेभ्यो मया न कथितं पुरा ॥ ४॥ देवाग्रे नैव दैत्याग्रे न शौनकगुणाग्रके । तव भक्त्या तु कवचं गोप्यं कर्तुं न शक्यते ॥ ५॥ एकादशमहाविद्या सवर्णा सद्गुणान्विता । सर्वशक्तिप्रधाना हि कवचं मन्मुखोदितम् ॥ ६॥ गणेशश्च रविर्विष्णुः शिवशक्तिश्च भैरवः । पञ्चतत्त्वादिसर्वेषां वर्मावर्तेन तुष्यताम् ॥ ७॥ ऊर्ध्वाम्नायं महामन्त्रं कवचं निर्मितं मया । त्रैलोक्यविजयं दिव्यं तुरीयं कवचं शुभम् ॥ ८॥ ॥ श्रीस्कन्द उवाच ॥ कवचं परमं देव्याः श्रोतुमिच्छाम्यऽहं प्रभो । यत्सूचितं त्वया पूर्व धर्मकामार्थमोक्षदम् ॥ ९॥ तद्विनाऽऽराधनं नास्ति जपं ध्यानादि कर्मणि । तस्याश्च कवचं यस्मात् तस्मात् तद्वद मे प्रभो ॥ १०॥ ॥ श्रीईश्वर उवाच ॥ श‍ृणु पुत्र महाप्राज्ञ ! रहस्यातिरहस्यकम् । तुरीयं कवचं दिव्यं सर्वमन्त्रमयं शुभम् ॥ ११॥ पूजान्ते तु जपात्पूर्वं कवचं समुदीरयेत् । ॥ विनियोगः ॥ अस्य श्रीकवचस्यास्य ऋषिरानन्दभैरवः ॥ १२॥ श्रीविद्या देवताश्छन्दो गायत्रीरुचिवृत्तिकम् । रमाबीजं पराशक्तिः वाग्भवं कीलकं स्मृतम् ॥ १३॥ मम सर्वार्थसिद्धयर्थे जपे तु विनियोगतः । ॥ करन्यासः ॥ अङ्गुष्ठाग्रे वाग्भवं च हृल्लेखां तर्जनी न्यसेत् ॥ १४॥ लक्ष्मीबीजं मध्यमायामङ्गिराऽनामिका तथा । पराबीजं कनिष्ठायां लक्ष्मीं करतले न्यसेत् ॥ १५॥ ॥ षडङ्गन्यासः ॥ हृदये वाग्भवं न्यस्यात् परां शिरसि च न्यसेत् । लक्ष्मीबीजं शिखायां च कवचे वाग्भवं न्यसेत् ॥ १६॥ हृल्लेखां नेत्रयोर्न्यस्यादस्त्रं तु कमलां न्यसेत् । ॥ दिग्बन्धनम् ॥ भूर्भुवः स्वरिति मनुना दिग्बन्धनमाचरेत् ॥ १७॥ ध्यानं तस्य प्रवक्ष्यामि धर्मकामार्थमोक्षदम् । न्यासध्यानादिकं सर्वं कृत्वा तु कवचं पठेत् ॥ १८॥ ॥ ध्यानम् ॥ क्षीरसागरमध्यस्थे रत्नद्वीपे मनोहरे । रत्नसिंहासने दिव्ये तत्र देवीं विचिन्तयेत् ॥ १९॥ कोटिसूर्यप्रतीकाशां चन्द्रकोटिनिभाननाम् । दाडिमीपुष्पसङ्काशां कुङ्कुमोदरसन्निभाम् ॥ २०॥ जपाकुसुमसङ्काशां त्रिनेत्रां च चतुर्भुजाम् । पाशाङ्कुशधरां रम्यामिक्षुचापशरान्विताम् ॥ २१॥ कर्पूरशकलोन्मिश्रताम्बूलपूरिताननाम् । सर्वश‍ृङ्गार वेषाढ्यां सर्वावयवशोभिनीम् ॥ २२॥ सर्वायुधसमायुक्तां प्रसन्नवदने क्षणाम् । सपरिवारसावरणां सर्वोपचारार्चिताम् ॥ २३॥ एवं ध्यायेत् ततो वीर ! कवचं सर्वकामदम् । आवर्तयेत् स्वदेहे तु सर्वरक्षाकरं शुभम् ॥ २४॥ ॥ अथ कवचपाठः ॥ शिखायां मे "ह्सौः" "पातु" "स्हौ" मे पातु ब्रह्मरन्ध्रके । सर्वदा "ह्लौं" च मां पातु वामदक्षिणभागयोः ॥ १॥ "ऐं ह्रीं श्रीं" सर्वदा पातु षोडशी सुन्दरी परा । "श्रीं ह्रीं क्लीं" सर्वदा पातु "ऐं सौं ॐ" पातु मे सदा ॥ २॥ "ह्रीं श्रीं ऐं" पातु सर्वत्र "क्नौं रं लं ह्रीं" सदा मम । "क्लीं हसकहलह्रीं" मे पातु सदा "सौः क्लीं" मम ॥ ३॥ "सौः ऐं क्लीं ह्रीं" श्रिया पातु सबीजा षोडशाक्षरी । आपादमस्तकं पातु महात्रिपुरसुन्दरी ॥ ४॥ श्रीजयन्ती मस्तके मां पातु नित्यं विभूतये । "ह्रीं" मङ्गला सदा नेत्रे पातु सर्वार्थसिद्धये ॥ ५॥ "क्लीं" कालिका कर्णयुग्मं पातु सर्वशुभावहा । "ऐं" भारती घ्राणयुग्मं पातु सर्वजयाप्तये ॥ ६॥ "सौः" कराली मुखं पातु सर्वलोकवशाप्तये । "ऐं" शारदा सदा वाचं पातु साहित्यसिद्धये ॥ ७॥ "ॐ" कपालिनी मे कर्णौ पातु सद्गानसिद्धये । "ह्रीं" दुर्गा सहिता पातु स्कन्धदेशौ सदा मम ॥ ८॥ "श्रीं" क्षमसहिता पातु हृदयं मम सर्वदा । "ककार"सहिता धात्री पार्श्वयुग्मं सदाऽवतु ॥ ९॥ "एकार"सहिता स्वाहा पातु मे जठरं सदा । "ईकार"सहिता नाभिं स्वधा मां सर्वदाऽवतु ॥ १०॥ "लकार"सहिता ब्राह्मी पृष्ठदेशं सदाऽवतु । "ह्रीङ्कार"सहमाहेशी कटिं पातु सदा मम ॥ ११॥ "हकार"सहिता गुह्यं कौमारी पातु सर्वदा । "सकार"सहिता पातु वैष्णवी गुददेशकम् ॥ १२॥ "ककार"युक्तावाराही ह्यूरुयुग्मं सदाऽवतु । "हकार"सहिता जानुयुग्मं माहेन्द्री मेऽवतु ॥ १३॥ "लकार"युक्ता चामुण्डा जङ्घायुग्मं सदाऽवतु । "ह्रीङ्कार"सहिता गुल्फयुग्मं लक्ष्मीः सदाऽवतु ॥ १४॥ "सकार"युक्ता मे पादयुग्मेऽव्यात् शिवदूतिका । "ककार"सहिता प्राच्यां चण्डा रक्षतु सर्वदा ॥ १५॥ "लकार"सहिताऽऽग्नेयां प्रचण्डा सर्वदाऽवतु । "ह्रीङ्कार"सहिता पातु दक्षिणे चण्डनायिका ॥ १६॥ "सौःकार"सहिता चण्डवेगिनी नैरृतेऽवतु । "ऐङ्कार"संयुता चण्डप्रकाशा पातु पश्चिमे ॥ १७॥ "क्लीङ्कार"सहिता पातु चण्डिका वायुगोचरे । "ह्रीङ्कार"सहिता पातु चामुण्डा चोत्तरे मम ॥ १८॥ "श्रीङ्कार"सहिता रौद्री पायादैशान्यके मम । "ऊर्ध्वं" ब्रह्माणी मे रक्षेत् षोडशीसह सर्वदा ॥ १९॥ अधस्ताद्वैष्णवी रक्षेत् पुनः षोडशीसंयुता । सर्वाङ्गं सर्वदा पातु सहिता भुवनेश्वरी ॥ २०॥ जले दावानलेऽरण्ये महोत्पाते च सागरे । दिवारात्रौ च मे रक्षेद् देवी तारत्रयी मम ॥ २१॥ ॥ फलश्रुति ॥ इदं तुरीयासहितं षोडशाक्षरिकात्मकम् । अभेद्यं कवचं त्वेदं मन्त्रबीजसमन्वितम् ॥ १॥ योगिनीचक्रसहितं तव प्रीत्या प्रकाशितम् । धारयस्व मया दत्तं गोपनीयं सुपुत्रक ॥ २॥ न पुत्राय न शिष्याय बन्धुभ्यो न प्रकाशयेत् । इदं त्रिपुरसुन्दर्यास्तुरीयं कवचं शुभम् ॥ ३॥ गोपनीयं प्रयत्नेन मन्त्रवर्णक्रमोदितम् । प्रातरारभ्य सायान्तं कर्मवेदान्तमोक्तिकम् ॥ ४॥ तत्फलं समवाप्नोति तुरीयकवचव्रतम् । दशधा मातृकान्यासं लघुषोढा ततः परम् ॥ ५॥ शक्तिन्यासं महाषोढां कृत्वा बाह्यान्तरं न्यसेत् । श्रीविद्यायां महान्यासं क्रमात् सावर्णतां व्रजेत् ॥ ६॥ पूजान्ते यत्फलं प्राप्तं तत्फलं कवचव्रते । सवत्सां दुग्धसहितां साधकः कामधेनुवत् ॥ ७॥ त्रैलोक्यविजयायेदं कवचं परमाद्भुतम् । यथा चिन्तामणौ पुत्र ! मनसा परिकल्पिते ॥ ८॥ तत्सर्वं लभते शीघ्रं मम वाक्यान्न संशयः । सायुरारोग्यमैश्वर्यं सदा सम्पत्प्रवर्धनम् ॥ ९॥ कवचस्य प्रभावेण त्रैलोक्यविजयी भवेत् । अदीक्षिताय न देयं श्रद्धाविरहितात्मने ॥ १०॥ नाख्येयं यस्य कस्यापि कृतघ्नायाततायिने । शान्ताय गुरुभक्ताय देयं शुद्धाय साधने ॥ ११॥ अज्ञात्वा कवचं चेदं यो जपेत् परदेवताम् । सिद्धिर्न जायते वत्स ! कल्पकोटिशतैरपि ॥ १२॥ स एव च गुरु साक्षात् कवचं यस्तु पुत्रक । त्रिसन्ध्यं च पठेन्नित्यमिदं कवचमुत्तमम् ॥ १३॥ निशार्धे जपकाले वा प्रत्यहं यन्त्रमग्रतः । जगद्वश्यं भवेच्छीघ्रं नात्र कार्या विचारणा ॥ १४॥ सप्तकोटिमहामन्त्राः सवर्णाः सगुणान्विताः । सर्वे प्रसन्नतां यान्ति सत्यं सत्यं न संशयः ॥ १५॥ इति ते कथितं दिव्यं सगुणे भजनक्रमम् । निर्गुणं परमं वक्ष्ये तुरीयं कवचं श‍ृणु ॥ १६॥ कवचस्यास्य माहात्म्यं वर्णितुं नैव शक्यते । मूलादिब्रह्मरन्ध्रान्तं श्रीचक्रं समुदीरयेत् ॥ १७॥ देहमध्ये च सर्वस्वं श्रीचक्रं चिन्तयेत् सुत । पञ्चविंशतितत्त्वं च अतलं वितलं तथा ॥ १८॥ सुतलं च तलातलं महातलं च पञ्चमम् । रसातलं षष्ठं वक्ष्ये सप्तमं पाताललोकम् ॥ १९॥ भूर्भुवः स्वर्लोकमतो महल्लोकजनस्तथा । तपश्च सत्यलोकश्च भुवनानि चतुर्दश ॥ २०॥ सर्वं श्रीभुवनं चैव निराकारं विचिन्तयेत् । मानसे पूजयेत् ध्यायेज्ज्योतिरूपं सुचिन्मयम् । कवचं प्रजपेद् वत्स ! राजराजेश्वरो भवेत् ॥ २१॥ इति परमरहस्यं सर्वमन्त्रार्थसारं भजति परमभक्त्या निश्चलं निर्मलत्वम् । विलसित भुवि मध्ये पुत्रपौत्राभिवृध्दिं धनसकलसमृध्दिं भोगमोक्षप्रदं च ॥ २२॥ ॥ इति श्रीचूडामणौ श्रीशिवस्कन्दसंवादे त्रैलोक्यविजयं नाम श्रीतुरीयाषोडशी श्रीराजराजेश्वरी महात्रिपुरसुन्दरीकवचं सम्पूर्णम् ॥