Sri Matangi Sahasranama Stotram – श्री मातङ्गी सहस्रनाम स्तोत्रम्

॥ श्री मातङ्गी (सुमुखी) सहस्रनाम स्तोत्रम् ॥ (श्री नन्द्यावर्त तन्त्रे उत्तरखण्डे ईश्वर उवाच) शृणु देवि प्रवक्ष्यामि साम्प्रतं तत्त्वतः परम् । नाम्नां सहस्रं परमं सुमुख्याः सिद्धये हितम् ॥ १ ॥ सहस्रनामपाठी यः सर्वत्र विजयी भवेत् । पराभवो न तस्यास्ति सभायां वा महारणे ॥ २ ॥ यथा तुष्टा भवेद्देवी सुमुखी चास्य पाठतः । तथा भवति देवेशि साधकः शिव एव सः ॥ ३ ॥ अश्वमेधसहस्राणि वाजपेयस्य कोटयः । सकृत्पाठेन जायन्ते प्रसन्ना सुमुखी भवेत् ॥ ४ ॥ मतङ्गोऽस्य ऋषिश्छन्दोऽनुष्टुब्देवी समीरिता । सुमुखी विनियोगः स्यात्सर्वसम्पत्तिहेतवे । एवं ध्यात्वा पठेदेतद्यदीच्छेत्सिद्धिमात्मनः ॥ ५ ॥ ॥ ध्यानम् ॥ देवीं षोडशवार्षिकीं शवगतां माध्वीरसाघूर्णितां श्यामाङ्गीमरुणाम्बरां पृथुकुचां गुञ्जावलीशोभिताम् । हस्ताभ्यां दधतीं कपालममलं तीक्ष्णां तथा कर्त्रिकां ध्यायेन्मानसपङ्कजे भगवतीमुच्छिष्टचाण्डालिनीम् ॥ १ ॥ ॥ स्तोत्रम् ॥ ओं सुमुखी शेमुषी सेव्या सुरसा शशिशेखरा । समानास्या साधनी च समस्तसुरसम्मुखी ॥ २ ॥ सर्वसम्पत्तिजननी सम्पदा सिन्धुसेविनी । शम्भुसीमन्तिनी सौम्या समाराध्या सुधारसा ॥ ३ ॥ सारङ्गा सवली वेला लावण्यवनमालिनी । वनजाक्षी वनचरी वनी वनविनोदिनी ॥ ४ ॥ वेगिनी वेगदा वेगा बगलस्था बलाधिका । काली कालप्रिया केली कमला कालकामिनी ॥ ५ ॥ कमला कमलस्था च कमलस्था कलावती । कुलीना कुटिला कान्ता कोकिला कलभाषिणी ॥ ६ ॥ कीरा केलिकरा काली कपालिन्यपि कालिका । केशिनी च कुशावर्ता कौशाम्भी केशवप्रिया ॥ ७ ॥ काली काशी महाकालसङ्काशा केशदायिनी । कुण्डला च कुलस्था च कुण्डलाङ्गदमण्डिता ॥ ८ ॥ कुण्डपद्मा कुमुदिनी कुमुदप्रीतिवर्धिनी । कुण्डप्रिया कुण्डरुचिः कुरङ्गनयनाकुला ॥ ९ ॥ कुन्दबिम्बालिनदिनी कुसुम्भकुसुमाकरा । काञ्ची कनकशोभाढ्या क्वणत्किङ्किणिकाकटिः ॥ १० ॥ कठोरकरणा काष्ठा कौमुदी कण्डवत्यपि । कपर्दिनी कपटिनी कठिनी कलकण्डिनी ॥ ११ ॥ कीरहस्ता कुमारी च कुरूढकुसुमप्रिया । कुञ्जरस्था कुजरता कुम्भी कुम्भस्तनी कला ॥ १२ ॥ कुम्भीकाङ्गा करभोरूः कदलीकुशशायिनी । कुपिता कोटरस्था च कङ्काली कन्दलालया ॥ १३ ॥ कपालवासिनी केशी कम्पमानशिरोरुहा । कादम्बरी कदम्बस्था कुङ्कुमप्रेमधारिणी ॥ १४ ॥ कुटुम्बिनी कृपायुक्ता क्रतुः क्रतुकरप्रिया । कात्यायनी कृत्तिका च कार्तिकी कुशवर्तिनी ॥ १५ ॥ कामपत्नी कामदात्री कामेशी कामवन्दिता । कामरूपा कामरतिः कामाख्या ज्ञानमोहिनी ॥ १६ ॥ खड्गिनी खेचरी खञ्जा खञ्जरीटेक्षणा खगा । खरगा खरनादा च खरस्था खेलनप्रिया ॥ १७ ॥ खरांशुः खेलिनी खट्वा खरा खट्वाङ्गधारिणी । खरखण्डिन्यपि ख्यातिः खण्डिता खण्डनप्रिया ॥ १८ ॥ खण्डप्रिया खण्डखाद्या खण्डसिन्धुश्च खण्डिनी । गङ्गा गोदावरी गौरी गौतम्यपि च गोमती ॥ १९ ॥ गङ्गा गया गगनगा गारुडी गरुडध्वजा । गीता गीतप्रिया गेया गुणप्रीतिर्गुरुर्गिरी ॥ २० ॥ गौर्गौरी गण्डसदना गोकुला गोप्रतारिणी । गोप्ता गोविन्दिनी गूढा गूढविग्रस्तगुञ्जिनी ॥ २१ ॥ गजगा गोपिनी गोपी गोक्षा जयप्रिया गणा । गिरिभूपालदुहिता गोगा गोकुलवासिनी ॥ २२ ॥ घनस्तनी घनरुचिर्घनोरुर्घननिःस्वना । घुङ्कारिणी घुक्षकरी घूघूकपरिवारिता ॥ २३ ॥ घण्टानादप्रिया घण्टा घोटा घोटकवाहिनी । घोररूपा च घोरा च घृतप्रीतिर्घृताञ्जनी ॥ २४ ॥ घृताची घृतवृष्टिश्च घण्टाघटघटावृता । घटस्था घटना घातकरी घातनिवारिणी ॥ २५ ॥ चञ्चरीकी चकोरी च चामुण्डा चीरधारिणी । चातुरी चपला चञ्चुश्चिता चिन्तामणिस्थिता ॥ २६ ॥ चातुर्वर्ण्यमयी चञ्चुश्चोराचार्या चमत्कृतिः । चक्रवर्तिवधूश्चित्रा चक्राङ्गी चक्रमोदिनी ॥ २७ ॥ चेतश्चरी चित्तवृत्तिश्चेतना चेतनप्रिया । चापिनी चम्पकप्रीतिश्चण्डा चण्डालवासिनी ॥ २८ ॥ चिरञ्जीविनी तच्चित्ता चिञ्चामूलनिवासिनी । छुरिका छत्रमध्यस्था छिन्दा छिन्दकरी छिदा ॥ २९ ॥ छुच्छुन्दरी छलप्रीतिश्छुच्छुन्दरिनिभस्वना । छलिनी छत्रदा छिन्ना छिण्टिच्छेदकरी छटा ॥ ३० ॥ छद्मिनी छान्दसी छाया छरुच्छन्दकरीत्यपि । जयदाजयदा जाती जायिनी जामला जतुः ॥ ३१ ॥ जम्बूप्रिया जीवनस्था जङ्गमा जङ्गमप्रिया । जपापुष्पप्रिया जप्या जगज्जीवा जगज्जनिः ॥ ३२ ॥ जगज्जन्तुप्रधाना च जगज्जीवपरा जवा । जातिप्रिया जीवनस्था जीमूतसदृशीरुचिः ॥ ३३ ॥ जन्या जनहिता जाया जन्मभूर्जम्भसी जभूः । जयदा जगदावासा जायिनी ज्वरकृच्छ्रजित् ॥ ३४ ॥ जपा च जपती जप्या जपार्हा जायिनी जना । जालन्धरमयी जानुर्जालौका जाप्यभूषणा ॥ ३५ ॥ जगज्जीवमयी जीवा जरत्कारुर्जनप्रिया । जगतीजननिरता जगच्छोभाकरी जवा ॥ ३६ ॥ जगतीत्राणकृज्जङ्घा जातीफलविनोदिनी । जातीपुष्पप्रिया ज्वाला जातिहा जातिरूपिणी ॥ ३७ ॥ जीमूतवाहनरुचिर्जीमूता जीर्णवस्त्रकृत् । जीर्णवस्त्रधरा जीर्णा ज्वलती जालनाशिनी ॥ ३८ ॥ जगत्क्षोभकरी जातिर्जगत्क्षोभविनाशिनी । जनापवादा जीवा च जननीगृहवासिनी ॥ ३९ ॥ जनानुरागा जानुस्था जलवासा जलार्तिकृत् । जलजा जलवेला च जलचक्रनिवासिनी ॥ ४० ॥ जलमुक्ता जलारोहा जलसा जलजेक्षणा । जलप्रिया जलौका च जलशोभावती तथा ॥ ४१ ॥ जलविस्फूर्जितवपुर्ज्वलत्पावकशोभिनी । झिञ्झा झिल्लमयी झिञ्झाझणत्कारकरी जया ॥ ४२ ॥ झञ्झी झम्पकरी झम्पा झम्पत्रासनिवारिणी । टङ्कारस्था टङ्ककरी टङ्कारकरणांहसा ॥ ४३ ॥ टङ्कारोट्‍टकृतष्ठीवा डिण्डीरवसनावृता । डाकिनी डामरी चैव डिण्डिमध्वनिनादिनी ॥ ४४ ॥ डकारनिःस्वनरुचिस्तपिनी तापिनी तथा । तरुणी तुन्दिला तुन्दा तामसी च तमःप्रिया ॥ ४५ ॥ ताम्रा ताम्रवती तन्तुस्तुन्दिला तुलसम्भवा । तुलाकोटिसुवेगा च तुल्यकामा तुलाश्रया ॥ ४६ ॥ तुदनी तुननी तुम्बी तुलाकाला तुलाश्रवा । तुमुला तुलजा तुलजा तुल्या तुलादानकरी तथा ॥ ४७ ॥ तुल्यवेगा तुल्यगतिस्तुलाकोटिनिनादिनी । ताम्रोष्ठा ताम्रपर्णी च तमःसङ्क्षोभकारिणी ॥ ४८ ॥ त्वरिता ज्वरहा तीरा तारकेशी तमालिनी । तमोदानवती ताम्रतालस्थानवती तमी ॥ ४९ ॥ तामसी च तमिस्रा च तीव्रा तीव्रपराक्रमा । तटस्था तिलतैलाक्ता तरुणी तपनद्युतिः ॥ ५० ॥ तिलोत्तमा च तिलकृत्तारकाधीशशेखरा । तिलपुष्पप्रिया तारा तारकेशी कुटुम्बिनी ॥ ५१ ॥ स्थाणुपत्नी स्थिरकरी स्थूलसम्पद्विवर्धिनी । स्थितिः स्थैर्यस्थविष्ठा च स्थपतिः स्थूलविग्रहा ॥ ५२ ॥ स्थूलस्थलवती स्थाली स्थलसङ्गविवर्धिनी । दण्डिनी दन्तिनी दामा दरिद्रा दीनवत्सला ॥ ५३ ॥ देवी देववधूर्दित्या दामिनी देवभूषणा । दया दमवती दीनवत्सला दाडिमस्तनी ॥ ५४ ॥ देवमूर्तिकरा दैत्या दारिणी देवतानता । दोलाक्रीडा दयालुश्च दम्पती देवतामयी ॥ ५५ ॥ दशादीपस्थिता दोषा दोषहा दोषकारिणी । दुर्गा दुर्गार्तिशमनी दुर्गम्या दुर्गवासिनी ॥ ५६ ॥ दुर्गन्धनाशिनी दुःस्था दुःखप्रशमकारिणी । दुर्गन्धा दुन्दुभिध्वान्ता दूरस्था दूरवासिनी ॥ ५७ ॥ दरदा दरदात्री च दुर्व्याधदयिता दमी । धुरन्धरा धुरीणा च धौरेयी धनदायिनी ॥ ५८ ॥ धीरारवा धरित्री च धर्मदा धीरमानसा । धनुर्धरा च धमनी धमनीधूर्तविग्रहा ॥ ५९ ॥ धूम्रवर्णा धूम्रपाना धूमला धूममोदिनी । नन्दिनीनन्दिनी नन्दा नन्दिनी नन्दबालिका ॥ ६० ॥ नवीना नर्मदा नर्मनमिर्नियमनिःस्वना । निर्मला निगमाधारा निम्नगा नग्नकामिनी ॥ ६१ ॥ नीला निरत्ना निर्वाणा निर्लोभा निर्गुणा नतिः । नीलग्रीवा निरीहा च निरञ्जनजनानवा ॥ ६२ ॥ निर्गुण्डिका च निर्गुण्डा निर्नासा नासिकाभिधा । पताकिनी पताका च पत्रप्रीतिः पयस्विनी ॥ ६३ ॥ पीना पीनस्तनी पत्नी पवनाशा निशामयी । परा परपरा काली पारकृत्यभुजप्रिया ॥ ६४ ॥ पवनस्था च पवना पवनप्रीतिवर्धिनी । पशुवृद्धिकरी पुष्पपोषिका पुष्टिवर्धिनी ॥ ६५ ॥ पुष्पिणी पुस्तककरा पूर्णिमाऽतलवासिनी । पेशी पाशकरी पाशा पांशुहा पांशुला पशुः ॥ ६६ ॥ पटुः पराशा परशुधारिणी पाशिनी तथा । पापघ्नी पतिपत्नी च पतिता पतितापनी ॥ ६७ ॥ पिशाची च पिशाचघ्नी पिशिताशनतोषिणी । पानदा पानपात्री च पानदानकरोद्यता ॥ ६८ ॥ पेया प्रसिद्धा पीयूषा पूर्णा पूर्णमनोरथा । पतङ्गाभा पतङ्गा च पौनःपुन्यमिवापरा ॥ ६९ ॥ पङ्किला पङ्कमग्ना च पानीया पञ्जरस्थिता । पञ्चमी पञ्चयज्ञा च पञ्चता पञ्चमप्रिया ॥ ७० ॥ पिचुमन्दा पुण्डरीका पिकी पिङ्गललोचना । प्रियङ्गुमञ्जरी पिण्डी पण्डिता पाण्डुरप्रभा ॥ ७१ ॥ प्रेतासना प्रियालस्था पाण्डुघ्नी पीनसापहा । फलिनी फलदात्री च फलश्रीः फलभूषणा ॥ ७२ ॥ फूत्कारकारिणी स्फारी फुल्ला फुल्लाम्बुजानना । स्फुलिङ्गहा स्फीतमतिः स्फीतकीर्तिकरी तथा ॥ ७३ ॥ बलमाया बलारातिर्बलिनी बलवर्धिनी । वेणुवाद्या वनचरी विरञ्चिजनयित्र्यपि ॥ ७४ ॥ विद्याप्रदा महाविद्या बोधिनी बोधदायिनी । बुद्धमाता च बुद्धा च वनमालावती वरा ॥ ७५ ॥ वरदा वारुणी वीणा वीणावादनतत्परा । विनोदिनी विनोदस्था वैष्णवी विष्णुवल्लभा ॥ ७६ ॥ वैद्या वैद्यचिकित्सा च विवशा विश्वविश्रुता । विद्यौघविह्वला वेला वित्तदा विगतज्वरा ॥ ७७ ॥ विरावा विवरीकारा बिम्बोष्ठी बिम्बवत्सला । विन्ध्यस्था वरवन्द्या च वीरस्थानवरा च वित् ॥ ७८ ॥ वेदान्तवेद्या विजया विजया विजयप्रदा । विरोगीवन्दिनी वन्ध्या वन्द्यबन्धनिवारिणी ॥ ७९ ॥ भगिनी भगमाला च भवानी भवनाशिनी । भीमा भीमाननाभीमा भङ्गुरा भीमदर्शना ॥ ८० ॥ भिल्ली भिल्लधरा भीरुर्भरुण्डा भीर्भयावहा । भगसर्पिण्यपि भगा भगरूपा भगालया ॥ ८१ ॥ भगासना भगाभोगा भेरीझङ्काररञ्जिता । भीषणा भीषणारावा भगवत्यहिभूषणा ॥ ८२ ॥ भारद्वाजा भोगदात्री भूतिघ्नी भूतिभूषणा । भूमिदा भूमिदात्री च भूपतिर्भरदायिनी ॥ ८३ ॥ भ्रमरी भ्रामरी भाला भूपालकुलसंस्थिता । माता मनोहरा माया मानिनी मोहिनी मही ॥ ८४ ॥ महालक्ष्मीर्मदक्षीबा मदिरा मदिरालया । मदोद्धता मतङ्गस्था माधवी मधुमर्दिनी ॥ ८५ ॥ मोदा मोदकरी मेधा मेध्या मध्याधिपस्थिता । मद्यपा मांसलोमस्था मोदिनी मैथुनोद्यता ॥ ८६ ॥ मूर्धावती महामाया मायामहिममन्दिरा । महामाला महाविद्या महामारी महेश्वरी ॥ ८७ ॥ महादेववधूर्मान्या मथुरा मेरुमण्डिता । मेदस्विनी मिलिन्दाक्षी महिषासुरमर्दिनी ॥ ८८ ॥ मण्डलस्था भगस्था च मदिरारागगर्विता । मोक्षदा मुण्डमाला च माला मालाविलासिनी ॥ ८९ ॥ मातङ्गिनी च मातङ्गी मातङ्गतनयापि च । मधुस्रवा मधुरसा बन्धूककुसुमप्रिया ॥ ९० ॥ यामिनी यामिनीनाथभूषा यावकरञ्जिता । यवाङ्कुरप्रिया यामा यवनी यवनार्दिनी ॥ ९१ ॥ यमघ्नी यमकल्पा च यजमानस्वरूपिणी । यज्ञा यज्ञयजुर्यक्षी यशोनिष्कम्पकारिणी ॥ ९२ ॥ यक्षिणी यक्षजननी यशोदायासधारिणी । यशःसूत्रपदा यामा यज्ञकर्मकरीत्यपि ॥ ९३ ॥ यशस्विनी यकारस्था यूपस्तम्भनिवासिनी । रञ्जिता राजपत्नी च रमा रेखा रवीरणा ॥ ९४ ॥ रजोवती रजश्चित्रा रञ्जनी रजनीपतिः । रोगिणी रजनी राज्ञो राज्यदा राज्यवर्धिनी ॥ ९५ ॥ राजन्वती राजनीतिस्तथा रजतवासिनी । रमणी रमणीया च रामा रामावती रतिः ॥ ९६ ॥ रेतोरती रतोत्साहा रोगघ्नी रोगकारिणी । रङ्गा रङ्गाङ्गमधुरा रोदसी च महारवा ॥ ९७ ॥ रामिका रजकी रेवा रजनी रङ्गलोचना । रक्तचर्मधरा रङ्गी रङ्गस्था रङ्गवाहिनी ॥ ९८ ॥ रमा रम्भाफलप्रीती रम्भोरू राघवप्रिया । रङ्गा रङ्गाङ्गमधुरा रोदसी च महारवा ॥ ९९ ॥ रोगकृद्रोगहन्त्री च रोगभृद्रोगस्राविणी । वन्दी वन्दिस्तुता बन्धुर्बन्धूककुसुमाधरा ॥ १०० ॥ वन्दिता वन्द्यमाना च वैद्रावी वेदविद्विधा । विकोपा विकपाला च विकस्था विङ्कवत्सला ॥ १०१ ॥ वेदिर्विलग्नलग्ना च विधिविङ्ककरी विधा । शङ्खिनी शङ्खवलया शङ्खमालावती शमी ॥ १०२ ॥ शङ्खपात्राशिनी शङ्खस्वना शङ्खगला शशी । शबरी शाम्बरी शम्भुः शम्भुकेशा शरासिनी ॥ १०३ ॥ शवा श्येनवती श्यामा श्यामाङ्गी श्यामलोचना । श्मशानस्था श्मशाना च श्मशानस्थानभूषणा ॥ १०४ ॥ शमदा शमहन्त्री च शङ्खिनी शङ्खरोषणा । शान्तिः शान्तिप्रदा शेषा शेषाख्या शेषशायिनी ॥ १०५ ॥ शेमुषी शोषिणी शेषा शौर्या शौर्यशरा शरी । शापदा शापहा शापा शापपन्थाः सदाशिवा ॥ १०६ ॥ शृङ्गिणी शृङ्गिपलभुक् शङ्करी शाङ्करी शिवा । शवस्था शवभुक् शान्ता शवकर्णा शवोदरी ॥ १०७ ॥ शाविनी शवशिंशाश्रीः शवा च शवशायिनी । शवकुण्डलिनी शैवा शीकरा शिशिराशना ॥ १०८ ॥ शवकाञ्ची शवश्रीका शवमाला शवाकृतिः । स्रवन्ती सङ्कुचा शक्तिः शन्तनुः शवदायिनी ॥ १०९ ॥ सिन्धुः सरस्वती सिन्धुः सुन्दरी सुन्दरानना । साधुः सिद्धिप्रदात्री च सिद्धा सिद्धसरस्वती ॥ ११० ॥ सन्ततिः सम्पदा संविच्छङ्किसम्पत्तिदायिनी । सपत्नी सरसा सारा सारस्वतकरी सुधा ॥ १११ ॥ सुरा समांसाशना च समाराध्या समस्तदा । समधीः सामदा सीमा सम्मोहा समदर्शना ॥ ११२ ॥ सामतिः सामदा सीमा सावित्री सविधा सती । सवना सवनासारा सवरा सावरा समी ॥ ११३ ॥ सिमरा सतता साध्वी सध्रीची ससहायिनी । हंसी हंसगतिर्हंसी हंसोज्ज्वलनिचोलयुक् ॥ ११४ ॥ हलिनी हालिनी हाला हलश्रीर्हरवल्लभा । हला हलवती ह्येषा हेला हर्षविवर्धिनी ॥ ११५ ॥ हन्तिर्हन्ता हया हाहाहताऽहन्तातिकारिणी । हङ्कारी हङ्कृतिर्हङ्का हीहीहाहाहिता हिता ॥ ११६ ॥ हीतिर्हेमप्रदा हाराराविणी हरिसम्मता । होरा होत्री होलिका च होमा होमहविर्हविः ॥ ११७ ॥ हरिणी हरिणीनेत्रा हिमाचलनिवासिनी । लम्बोदरी लम्बकर्णा लम्बिका लम्बविग्रहा ॥ ११८ ॥ लीला लीलावती लोला ललना ललिता लता । ललामलोचना लोभ्या लोलाक्षी सत्कुलालया ॥ ११९ ॥ लपत्नी लपती लम्या लोपामुद्रा ललन्तिका । लतिका लङ्घिनी लङ्घा लालिमा लघुमध्यमा ॥ १२० ॥ लघीयसी लघूदर्या लूता लूताविनाशिनी । लोमशा लोमलम्बी च ललन्ती च लुलुम्पती ॥ १२१ ॥ लुलायस्था च लहरी लङ्कापुरपुरन्दरा । लक्ष्मीर्लक्ष्मीप्रदा लभ्या लाक्षाक्षी लुलितप्रभा ॥ १२२ ॥ क्षणा क्षणक्षुः क्षुत्क्षिणी क्षमा क्षान्तिः क्षमावती । क्षामा क्षामोदरी क्षेम्या क्षौमभृत्क्षत्रियाङ्गना ॥ १२३ ॥ क्षया क्षयाकरी क्षीरा क्षीरदा क्षीरसागरा । क्षेमङ्करी क्षयकरी क्षयकृत्क्षयदा क्षतिः ॥ १२४ ॥ क्षुद्रिकाऽक्षुद्रिका क्षुद्रा क्षुत्क्षमा क्षीणपातका । मातुः सहस्रनामेदं सुमुख्याः सिद्धिदायकम् ॥ १२५ ॥ ॥ फलश्रुति ॥ यः पठेत्प्रयतो नित्यं स एव स्यान्महेश्वरः । अनाचारात्पठेन्नित्यं दरिद्रो धनवान्भवेत् ॥ १२६ ॥ मूकः स्याद्वाक्पतिर्देवि रोगी नीरोगतां व्रजेत् । पुत्रार्थी पुत्रमाप्नोति त्रिषु लोकेषु विश्रुतम् ॥ १२७ ॥ वन्ध्यापि सूते सत्पुत्रं विदुषः सदृशं गुरोः । सत्यं च बहुधा भूयाद्गावश्च बहुदुग्धदाः ॥ १२८ ॥ राजानः पादनम्राः स्युस्तस्य हासा इव स्फुटाः । अरयः सङ्क्षयं यान्ति मानसा संस्मृता अपि ॥ १२९ ॥ दर्शनादेव जायन्ते नरा नार्योऽपि तद्वशाः । कर्ता हर्ता स्वयं वीरो जायते नात्र संशयः ॥ १३० ॥ यं यं कामयते कामं तं तं प्राप्नोति निश्चितम् । दुरितं न च तस्यास्ति नास्ति शोकः कथञ्चन ॥ १३१ ॥ चतुष्पथेऽर्धरात्रे च यः पठेत्साधकोत्तमः । एकाकी निर्भयो वीरो दशवारं स्तवोत्तमम् ॥ १३२ ॥ मनसा चिन्तितं कार्यं तस्य सिद्ध्येन्न संशयः । विना सहस्रनाम्नां यो जपेन्मन्त्रं कदाचन ॥ १३३ ॥ न सिद्धिर्जायते तस्य कल्पकोटिशतैरपि । कुजवारे श्मशाने वा मध्याह्ने यो जपेत्सदा ॥ १३४ ॥ कृतकृत्यः स जायेत कर्ता हर्ता नृणामिह । रोगार्तोऽर्धनिशायां यः पठेदासनसंस्थितः ॥ १३५ ॥ सद्यो नीरोगतामेति यदि स्यान्निर्भयस्तदा । अर्धरात्रे श्मशाने वा शनिवारे जपेन्मनुम् ॥ १३६ ॥ अष्टोत्तरसहस्रं तु दशवारं जपेत्ततः । सहस्रनाम चैतद्धि तदा याति स्वयं शिवा ॥ १३७ ॥ महापवनरूपेण घोरगोमायुनादिनी । ततो यदि न भीतिः स्यात्तदा देहीति वाग्भवेत् ॥ १३८ ॥ तदा पशुबलिं दद्यात्स्वयं गृह्णाति चण्डिका । यथेष्टं च वरं दत्त्वा प्रयाति सुमुखी शिवा ॥ १३९ ॥ रोचनागुरुकस्तूरीकर्पूरैश्च सचन्दनैः । कुङ्कुमेन दिने श्रेष्ठे लिखित्वा भूर्जपत्रके ॥ १४० ॥ शुभनक्षत्रयोगे च कृतमारुतसत्क्रियः । कृत्वा सम्पातनविधिं धारयेद्दक्षिणे करे ॥ १४१ ॥ सहस्रनाम स्वर्णस्थं कण्ठे वा विजितेन्द्रियः । तदा यं प्रणमेन्मन्त्री क्रुद्धः स म्रियते नरः ॥ १४२ ॥ दुष्टश्वापदजन्तूनां न भीः कुत्रापि जायते । बालकानामियं रक्षा गर्भिणीनामपि प्रिये ॥ १४३ ॥ मोहनस्तम्भनाकर्षमारणोच्चाटनानि च । यन्त्रधारणतो नूनं जायन्ते साधकस्य तु ॥ १४४ ॥ नीलवस्त्रे विलिख्यैतत्तद्ध्वजे स्थापयेद्यदि । तदा नष्टा भवत्येव प्रचण्डाप्यरिवाहिनी ॥ १४५ ॥ एतज्जप्तं महाभस्म ललाटे यदि धारयेत् । तद्विलोकन एव स्युः प्राणिनस्तस्य किङ्कराः ॥ १४६ ॥ राजपत्न्योऽपि विवशाः किमन्याः पुरयोषितः । एतज्जप्तं पिबेत्तोयं मासेन स्यान्महाकविः ॥ १४७ ॥ पण्डितश्च महावादी जायते नात्र संशयः । अयुतं च पठेत् स्तोत्रं पुरश्चरणसिद्धये ॥ १४८ ॥ दशांशं कमलैर्हुत्वा त्रिमध्वक्तैर्विधानतः । स्वयमायाति कमला वाण्या सह तदालये ॥ १४९ ॥ मन्त्रो निष्कीलतामात सुमुखी सुमुखी भवेत् । अनन्तं च भवेत्पुण्यमपुण्यं च क्षयं व्रजेत् ॥ १५० ॥ पुष्करादिषु तीर्थेषु स्नानतो यत्फलं भवेत् । तत्फलं लभते जन्तुः सुमुख्याः स्तोत्रपाठतः ॥ १५१ ॥ एतदुक्तं रहस्यं ते स्वसर्वस्वं वरानने । न प्रकाश्यं त्वया देवि यदि सिद्धिं त्वमिच्छसि ॥ १५२ ॥ प्रकाशनादसिद्धिः स्यात्कुपिता सुमुखी भवेत् । नातः परतरं लोके सिद्धिदं प्राणिनामिह ॥ १५३ ॥ वन्दे श्रीसुमुखीं प्रसन्नवदनां पूर्णेन्दुबिम्बाननां सिन्दूराङ्कितमस्तकां मधुमदोल्लोलां च मुक्तावलीम् । श्यामां कज्जलिकाकरां करगतं चाध्यापयन्तीं शुकं गुञ्जापुञ्जविभूषणां सकरुणामामुक्तवेणीलताम् ॥ १५४ ॥ ॥ इति श्रीनन्द्यावर्ततन्त्रे उत्तरखण्डे मातङ्गी सहस्रनाम स्तोत्रम् सम्पूर्णम् ॥