Sri Bala Manasa Puja Stotram – श्री बाला मानसपूजा स्तोत्रम्

॥ श्री बाला मानसपूजा स्तोत्रम् ॥ ॥ १. ध्यानम् ॥ उद्यद्भानुसहस्रकान्तिमरुणक्षौमाम्बरालङ्कृतां गन्धालिप्तपयोधरां जपवटीं विद्यामभीतिं वरम् । हस्ताब्जैर्दधतीं त्रिणेत्रविलसद्वक्त्रारविन्दश्रियं देवीं बद्धहिमांशुरत्नमकुटां वन्देऽरविन्दस्थिताम् ॥ १ ॥ ॥ २. आसनम् ॥ एणधराश्मकृतोन्नतधिष्ण्यं हेमविनिर्मितपादमनोज्ञम् । शोणशिलाफलकं च विशालं देवि सुखासनमद्य ददामि ॥ २ ॥ ॥ ३. पाद्यम् ॥ ईशमनोहररूपविलासे शीतलचन्दनकुङ्कुममिश्रम् । हृद्यसुवर्णघटे परिपूर्णं पाद्यमिदं त्रिपुरेशि गृहाण ॥ ३ ॥ ॥ ४. अर्घ्यम् ॥ लब्धभवत्करुणोऽहमिदानीं रक्तसुमाक्षतयुक्तमनर्घम् । रुक्मविनिर्मितपात्रविशेषे- -ष्वर्घ्यमिदं त्रिपुरेशि गृहाण ॥ ४ ॥ ॥ ५. आचमनम् ॥ ह्रीमिति मन्त्रजपेन सुगम्ये हेमलतोज्ज्वलदिव्यशरीरे । योगिमनः समशीतजलेन ह्याचमनं त्रिपुरेऽद्य विधेहि ॥ ५ ॥ ॥ ६. स्नानम् ॥ हस्तलसत्कटकादि सुभूषाः आदरतोऽम्ब वरोप्य निधाय । चन्दनवासितमन्त्रिततोयैः स्नानमयि त्रिपुरेशि विधेहि ॥ ६ ॥ ॥ ७. वस्त्रम् ॥ सञ्चितमम्ब मया ह्यतिमूल्यं कुङ्कुमशोणमतीव मृदु त्वम् । शङ्करतुङ्गतराङ्कनिवासे वस्त्रयुगं त्रिपुरे परिधेहि ॥ ७ ॥ ॥ ८. आभूषणम् ॥ कन्दलदंशुकिरीटमनर्घं कङ्कणकुण्डलनूपुरहारम् । अङ्गदमङ्गुलिभूषणमम्ब स्वीकुरु देवि पुराधिनिवासे ॥ ८ ॥ ॥ ९. चन्दनम् ॥ हस्तलसद्वरभीतिहमुद्रे शस्ततरं मृगनाभिसमेतम् । सद्घनसारसुकुङ्कुममिश्रं चन्दनपङ्कमिदं च गृहाण ॥ ९ ॥ ॥ १०. पुष्पम् ॥ लब्धविकासकदम्बकजाती- -चम्पकपङ्कजकेतकयुक्तैः । पुष्यचयैर्मनसामुचितैस्त्वां अम्ब पुरेशि भवानि भजामि ॥ १० ॥ ॥ ११. धूपम् ॥ ह्रीं‍पदशोभिमहामनुरूपे धूरसि मन्त्रवरेण मनोज्ञम् । अष्टसुगन्धरजःकृतमाद्ये धूपमिमं त्रिपुरेशि ददामि ॥ ११ ॥ ॥ १२. दीपम् ॥ सन्तमसापहमुज्ज्वलपात्रे गव्यघृतैः परिवर्धितदेहम् । चम्पककुड्मलवृन्तसमानं दीपगणं त्रिपुरेऽद्य गृहाण ॥ १२ ॥ ॥ १३. नैवेद्यम् ॥ कल्पितमद्य धियाऽमृतकल्पं दुग्धसितायुतमन्नविशेषम् । माषविनिर्मितपूपसहस्रं स्वीकुरु देवि निवेदनमाद्ये ॥ १३ ॥ ॥ १४. ताम्बूलम् ॥ लङ्घितकेतकवर्णविशेषैः शोधितकोमलनागदलैश्च । मौक्तिकचूर्णयुतैः क्रमुकाद्यैः पूर्णतराम्ब पुरस्तव पात्री ॥ १४ ॥ ॥ १५. मन्त्रपुष्पाञ्जलिः ॥ ह्रीं‍त्रयपूरितमन्त्रविशेषं पञ्चदशीमपि षोडशरूपम् । सञ्चितपापहरं च जपित्वा मन्त्रसुमाञ्जलिमम्ब ददामि ॥ १५ ॥ ॥ १६. नमस्कारः ॥ श्रीं‍पदपूर्णमहामनुरूपे श्रीशिवकाममहेश्वरहृद्ये । श्रीगुहवन्दितपादपयोजे बालवपुर्धरदेवि नमस्ते ॥ १६ ॥ ॥ इति श्री बाला मानसपूजा स्तोत्रम् सम्पूर्णम् ॥