Sri Hatkeshwar Ashtakam – श्री हाटकेश्वराष्टकम्

जटातटान्तरोल्लसत्सुरापगोर्मिभास्वरं ललाटनेत्रमिन्दुनाविराजमानशेखरम् । लसद्विभूतिभूषितं फणीन्द्रहारमीश्वरं नमामि नाटकेश्वरं भजामि हाटकेश्वरम् ॥ १ ॥ पुरान्धकादिदाहकं मनोभवप्रदाहकं महाघराशिनाशकं अभीप्सितार्थदायकम् । जगत्त्रयैककारकं विभाकरं विदारकं नमामि नाटकेश्वरं भजामि हाटकेश्वरम् ॥ २ ॥ मदीय मानसस्थले सदाऽस्तु ते पदद्वयं मदीय वक्त्रपङ्कजे शिवेति चाक्षरद्वयम् । मदीय लोचनाग्रतः सदाऽर्धचन्द्रविग्रहं नमामि नाटकेश्वरं भजामि हाटकेश्वरम् ॥ ३ ॥ भजन्ति हाटकेश्वरं सुभक्तिभावतोत्रये भजन्ति हाटकेश्वरं प्रमाणमात्र नागराः । धनेन तेज साधिकाः कुलेन चाऽखिलोन्नताः नमामि नाटकेश्वरं भजामि हाटकेश्वरम् ॥ ४ ॥ सदाशिवोऽहमित्यहर्निशं भजेत यो जनाः सदा शिवं करोति तं न संशयोऽत्र कश्चन । अहो दयालुता महेश्वरस्य दृश्यतां बुधा नमामि नाटकेश्वरं भजामि हाटकेश्वरम् ॥ ५ ॥ धराधरात्मजापते त्रिलोचनेश शङ्करं गिरीश चन्द्रशेखराऽहिराजभूषणेश्वरः । महेश नन्दिवाहनेति सङ्घटन्नहर्निशं नमामि नाटकेश्वरं भजामि हाटकेश्वरम् ॥ ६ ॥ महेश पाहि मां मुदा गिरीश पाहि मां सदा भवार्णवे निमज्जतस्त्वमेव मेऽसि तारकः । करावलम्बनं झटित्यहोऽधुना प्रदीयतां नमामि नाटकेश्वरं भजामि हाटकेश्वरम् ॥ ७ ॥ धराधरेश्वरेश्वरं शिवं निधीश्वरेश्वरं सुरासुरेश्वरं रमापतीश्वरं महेश्वरम् । प्रचण्ड चण्डिकेश्वरं विनीत नन्दिकेश्वरं नमामि नाटकेश्वरं भजामि हाटकेश्वरम् ॥ ८ ॥ हाटकेशस्य भक्त्या यो हाटकेशाष्टकं पठेत् । हाटकेश प्रसादेन हाटकेशत्वमाप्नुयात् ॥ ९ ॥ इति श्री हाटकेश्वराष्टकम् । इतर पश्यतु ।